pi kar sharab shaiKH ne bhaunchaal kar diya

pī kar sharāb shaiḳh ne bhauñchāl kar diyā

hazrat kā muġhbachoñ ne jo phir haal kar diyā

sabr-o-qarār jāh-o-hasham dīn-o-jān-o-dil

yaksar ḳhirām-e-nāz ne pāmāl kar diyā

zulm-o-sitam huā javāñ-mardī to na huī

pal meñ sip.har-e-pīr ne jo zaal kar diyā

miTTī nigal ga.ī naujavānoñ kī hastiyāñ

gardūñ ne naunihāl ko pāmāl kar diyā

roTī uchak lī maiñ ne ba-unvān-e-muflisī

ġhurbat ne merī mujh ko bad-a.amāl kar diyā

nukta-sarā the kyā huā 'hāvī' miyāñ tumheñ

sher-o-suḳhan ko vaqf-e-ḳhat-o-ḳhāl kar diyā

pi kar sharab shaiKH ne bhaunchaal kar diya

hazrat ka mughbachon ne jo phir haal kar diya

sabr-o-qarar jah-o-hasham din-o-jaan-o-dil

yaksar KHiram-e-naz ne pamal kar diya

zulm-o-sitam hua jawan-mardi to na hui

pal mein siphar-e-pir ne jo zal kar diya

miTTi nigal gai naujawanon ki hastiyan

gardun ne naunihaal ko pamal kar diya

roTi uchak li main ne ba-unwan-e-muflisi

ghurbat ne meri mujh ko bad-amal kar diya

nukta-sara the kya hua 'hawi' miyan tumhein

sher-o-suKHan ko waqf-e-KHat-o-KHal kar diya