pi li to kuchh pata na chala wo surur tha

pī lī to kuchh pata na chalā vo surūr thā

vo us kā saaya thā ki vahī rashk-e-hūr thā

kal maiñ ne us ko dekhā to dekhā nahīñ gayā

mujh se bichhaḌ ke vo bhī bahut ġham se chuur thā

royā thā kaun kaun mujhe kuchh ḳhabar nahīñ

maiñ us ghaḌī vatan se ka.ī miil duur thā

shām-e-firāq aa.ī to dil Dūbne lagā

ham ko bhī apne aap pe kitnā ġhurūr thā

chehra thā yā sadā thī kisī bhūlī yaad kī

āñkheñ thiiñ us kī yaaro ki dariyā-e-nūr thā

niklā jo chāñd aa.ī mahak tez sī 'munīr'

mere sivā bhī baaġh meñ koī zarūr thā

pi li to kuchh pata na chala wo surur tha

wo us ka saya tha ki wahi rashk-e-hur tha

kal main ne us ko dekha to dekha nahin gaya

mujh se bichhaD ke wo bhi bahut gham se chur tha

roya tha kaun kaun mujhe kuchh KHabar nahin

main us ghaDi watan se kai mil dur tha

sham-e-firaq aai to dil Dubne laga

hum ko bhi apne aap pe kitna ghurur tha

chehra tha ya sada thi kisi bhuli yaad ki

aankhen thin us ki yaro ki dariya-e-nur tha

nikla jo chand aai mahak tez si 'munir'

mere siwa bhi bagh mein koi zarur tha