pine pe laga kar pabandi dushnam ki baaten karte hain

piine pe lagā kar pābandī dushnām kī bāteñ karte haiñ

ye zāhid-o-ābid masjid meñ ḳhud jaam kī bāteñ karte haiñ

kyoñ aaj haiñ vo ghabrā.e hue ilzām kī bāteñ karte haiñ

āġhāz-e-mohabbat se pahle anjām kī bāteñ karte haiñ

jab merī vafā mashkūk nahīñ phir baat ye kaisī hotī hai

mahfil meñ bulā kar āḳhir kyoñ ilzām kī bāteñ karte haiñ

kyā ġhuncha-o-gul se nisbat hai be-kār hai zīnat gulshan kī

kāñToñ pe basar karne vaale ārām kī bāteñ karte haiñ

jab rāz-e-mohabbat khulne se tauhīn-e-mohabbat hotī hai

kyoñ ashk-e-nadāmat āñkhoñ meñ ilzām kī bāteñ karte haiñ

kis tarah guzāre hijr kā din ye baat na pūchho 'aḳhtar' se

vo sub.h kī bāteñ kyā jāneñ jo shaam kī bāteñ karte haiñ

pine pe laga kar pabandi dushnam ki baaten karte hain

ye zahid-o-abid masjid mein KHud jam ki baaten karte hain

kyon aaj hain wo ghabrae hue ilzam ki baaten karte hain

aaghaz-e-mohabbat se pahle anjam ki baaten karte hain

jab meri wafa mashkuk nahin phir baat ye kaisi hoti hai

mahfil mein bula kar aaKHir kyon ilzam ki baaten karte hain

kya ghuncha-o-gul se nisbat hai be-kar hai zinat gulshan ki

kanTon pe basar karne wale aaram ki baaten karte hain

jab raaz-e-mohabbat khulne se tauhin-e-mohabbat hoti hai

kyon ashk-e-nadamat aankhon mein ilzam ki baaten karte hain

kis tarah guzare hijr ka din ye baat na puchho 'aKHtar' se

wo subh ki baaten kya jaanen jo sham ki baaten karte hain