piri mein bhala DhunDhiye kya baKHt-e-jawan ko

piirī meñ bhalā DhūñDhiye kyā baḳht-e-javāñ ko

ab qat-e-mohabbat hī huī jism se jaañ ko

mauqūf kar is bazm meñ ye charb-zabānī

ai sham.a tū kaTvā.e hai kyuuñ apnī zabāñ ko

be-nām-o-nishānī hī baḌā nām-o-nishāñ hai

kyā nām-o-nishāñ chāhiye benām-o-nishāñ ko

is manzil-e-hastī meñ Thahartā nahīñ koī

kyā jaane ki ye qāfila jaatā hai kahāñ ko

insān to hai sūrat-e-haq ka.abe meñ kyā hai

ai shaiḳh bhalā kyuuñ na karūñ sajde butāñ ko

'joshish' gul-e-mazmūn-e-chaman tab.a kā tere

dekhe na kabhī tā-ba-abad rū-e-ḳhizāñ ko

piri mein bhala DhunDhiye kya baKHt-e-jawan ko

ab qat-e-mohabbat hi hui jism se jaan ko

mauquf kar is bazm mein ye charb-zabani

ai shama tu kaTwae hai kyun apni zaban ko

be-nam-o-nishani hi baDa nam-o-nishan hai

kya nam-o-nishan chahiye benam-o-nishan ko

is manzil-e-hasti mein Thaharta nahin koi

kya jaane ki ye qafila jata hai kahan ko

insan to hai surat-e-haq kabe mein kya hai

ai shaiKH bhala kyun na karun sajde butan ko

'joshish' gul-e-mazmun-e-chaman taba ka tere

dekhe na kabhi ta-ba-abad ru-e-KHizan ko