piri se mera nau digar-haal hua hai

piirī se mirā nau digar-hāl huā hai

vo qad jo alif sā thā so ab daal huā hai

maqbūl mire qaul se qavvāl huā hai

suufī ko ġhazal sun ke mirī haal huā hai

un hāthoñ kī daulat se kaḌā maal huā hai

un paañv se āvāz-e-ḳhalḳhāl huā hai

alminnat o lillāh ba-sad-minnat udhar se

inkār thā jis shai kā ab iqbāl huā hai

jab qatl kiyā hai kisī āshiq ko to vaañ se

jallād kī talvār ko rūmāl huā hai

kis uqde ko is zulf kī kholā nahīñ ham ne

suljhāyā hai uljhā huā jo baal huā hai

kis sar ko nahīñ yaar kī raftār kā saudā

me.arāj vo samjhā hai jo pāmāl huā hai

bīmār rahā barsoñ maiñ īsā-nafasoñ meñ

pūchhā na kisī ne kabhī kyā haal huā hai

ai abr-e-karam tū hī safed us ko karegā

barsoñ meñ siyah nāma-e-a.amāl huā hai

jo naaz kare yaar sazā-vār hai 'ātish'

ḳhush-rū o ḳhush-uslūb o ḳhush-iqbāl huā hai

piri se mera nau digar-haal hua hai

wo qad jo alif sa tha so ab dal hua hai

maqbul mere qaul se qawwal hua hai

sufi ko ghazal sun ke meri haal hua hai

un hathon ki daulat se kaDa mal hua hai

un panw se aawaz-e-KHalKHal hua hai

alminnat o lillah ba-sad-minnat udhar se

inkar tha jis shai ka ab iqbaal hua hai

jab qatl kiya hai kisi aashiq ko to wan se

jallad ki talwar ko rumal hua hai

kis uqde ko is zulf ki khola nahin hum ne

suljhaya hai uljha hua jo baal hua hai

kis sar ko nahin yar ki raftar ka sauda

mearaj wo samjha hai jo pamal hua hai

bimar raha barson main isa-nafason mein

puchha na kisi ne kabhi kya haal hua hai

ai abr-e-karam tu hi safed us ko karega

barson mein siyah nama-e-amal hua hai

jo naz kare yar saza-war hai 'atish'

KHush-ru o KHush-uslub o KHush-iqbaal hua hai