pila saqiya arghawani sharab

pilā sāqiyā arġhavānī sharāb

ki piirī meñ de naujavānī sharāb

vo sho.ala hai saaqī ki rañjak kī tarah

uḌā detī hai nā-tavānī sharāb

kahāñ bāda-e-aish taqdīr meñ

piyūñ maiñ to ho jaa.e paanī sharāb

na laayā hai shīsha na jām-o-subū

pilātā hai saaqī zabānī sharāb

kahāñ aql-e-barnā kahāñ aql-e-pīr

na.e se hai behtar purānī sharāb

mire chehra-e-zard ke aks se

huī sāqiyā za.afrānī sharāb

hue mast dekhā jo phūloñ kā rañg

piyāloñ meñ thī arġhavānī sharāb

kahāñ chashma-e-ḳhizr kaise ḳhizar

ḳhizar hai mirī zindagānī sharāb

ḳhizar huuñ agar maiñ to jā kar piyūñ

sar-e-chashma-e-zindagānī sharāb

gulistāñ hai phūloñ se kyā laal laal

chale sāqiyā arġhavānī sharāb

ajab sāqiyā gandumī rañg hai

ki partav se bantī hai dhānī sharāb

rahe taaq par pārsā.ī 'amīr'

pilā.e jo vo yār-e-jānī sharāb

pila saqiya arghawani sharab

ki piri mein de naujawani sharab

wo shoala hai saqi ki ranjak ki tarah

uDa deti hai na-tawani sharab

kahan baada-e-aish taqdir mein

piyun main to ho jae pani sharab

na laya hai shisha na jam-o-subu

pilata hai saqi zabani sharab

kahan aql-e-barna kahan aql-e-pir

nae se hai behtar purani sharab

mere chehra-e-zard ke aks se

hui saqiya zafrani sharab

hue mast dekha jo phulon ka rang

piyalon mein thi arghawani sharab

kahan chashma-e-KHizr kaise KHizar

KHizar hai meri zindagani sharab

KHizar hun agar main to ja kar piyun

sar-e-chashma-e-zindagani sharab

gulistan hai phulon se kya lal lal

chale saqiya arghawani sharab

ajab saqiya gandumi rang hai

ki partaw se banti hai dhani sharab

rahe taq par parsai 'amir'

pilae jo wo yar-e-jaani sharab