piyo ki ma-hasal-e-hosh kis ne dekha hai

piyo ki mā-hasal-e-hosh kis ne dekhā hai

tamām vahm-o-gumāñ hai tamām dhokā hai

na kyuuñ ho sāhib-e-jām-e-jahāñ-numā ko hasad

sharāb se mujhe apnā surāġh miltā hai

kisī ne ḳhvāb ke reze palak palak chun kar

jo shāhkār banāyā hai TuuT saktā hai

maiñ intizār karūñgā agar mirī fariyād

abhī sukūt-ba-gulshan, sadā-ba-sahrā hai

yahī savāb hai kyā kam mirī riyāzat kā

ki ek ḳhalq tire naam se shanāsā hai

zahe-nasīb ki us ko mirā ḳhayāl aayā

magar ye baat haqīqat nahīñ tamannā hai

gunāhgār huuñ ai mādar-e-adam mujh ko

bilak bilak ke tire bāzuoñ meñ ronā hai

ḳhamīr ek hai sab kā to ai zamīn ai maañ

zabān-o-maz.hab-o-qaum-o-vatan ye sab kyā hai

ġhalat sahī magar āsāñ nahīñ ki ye nukta

kisī hakīm ne apne lahū se likkhā hai

payambaroñ ko utārā gayā thā qaumoñ par

ḳhudā ne mujh pe magar qaum ko utārā hai

piyo ki ma-hasal-e-hosh kis ne dekha hai

tamam wahm-o-guman hai tamam dhoka hai

na kyun ho sahib-e-jam-e-jahan-numa ko hasad

sharab se mujhe apna suragh milta hai

kisi ne KHwab ke reze palak palak chun kar

jo shahkar banaya hai TuT sakta hai

main intizar karunga agar meri fariyaad

abhi sukut-ba-gulshan, sada-ba-sahra hai

yahi sawab hai kya kam meri riyazat ka

ki ek KHalq tere nam se shanasa hai

zahe-nasib ki us ko mera KHayal aaya

magar ye baat haqiqat nahin tamanna hai

gunahgar hun ai madar-e-adam mujh ko

bilak bilak ke tere bazuon mein rona hai

KHamir ek hai sab ka to ai zamin ai man

zaban-o-mazhab-o-qaum-o-watan ye sab kya hai

ghalat sahi magar aasan nahin ki ye nukta

kisi hakim ne apne lahu se likkha hai

payambaron ko utara gaya tha qaumon par

KHuda ne mujh pe magar qaum ko utara hai