arz jo kuchh meri zabani hai

'arz jo kuchh merī zabānī hai

āp-bītī nahīñ kahānī hai

jis ne muñh madrase kā dekh liyā

zindagī meñ vo āñ-jahānī hai

raah maktab kī bhūlne ke liye

ḳhaak ik ik galī kī chhānī hai

paḌhne likhne meñ jī nahīñ lagtā

maar khāne kī ye nishānī hai

ḳhaak paḌhiye jo ho ġhizā aisī

bhaat kankar hai daal paanī hai

jaur-e-ustād hai na mahr-e-pidar

kis qayāmat kī ye girānī hai

har juma gōd-friday hai mirā

raat bhī us kī kyā suhānī hai

paar huuñ imtihāñ ke dariyā se

naav kāġhaz kī yuuñ chalānī hai

phir bhalā ham kahāñ kahāñ masjid

ye namāz apnī imtihānī hai

ye ġhazal ḳhuub hai 'jalāl' miyāñ

kyā salāsat hai kyā ravānī hai

lakhnavī ye jalāl garche nahīñ

kākvī ye jalāl-e-sānī hai

'arz jo kuchh meri zabani hai

aap-biti nahin kahani hai

jis ne munh madrase ka dekh liya

zindagi mein wo aan-jahani hai

rah maktab ki bhulne ke liye

KHak ek ek gali ki chhani hai

paDhne likhne mein ji nahin lagta

mar khane ki ye nishani hai

KHak paDhiye jo ho ghiza aisi

bhat kankar hai dal pani hai

jaur-e-ustad hai na mahr-e-pidar

kis qayamat ki ye girani hai

har juma good-friday hai mera

raat bhi us ki kya suhani hai

par hun imtihan ke dariya se

naw kaghaz ki yun chalani hai

phir bhala hum kahan kahan masjid

ye namaz apni imtihani hai

ye ghazal KHub hai 'jalal' miyan

kya salasat hai kya rawani hai

lakhnawi ye jalal garche nahin

kakwi ye jalal-e-sani hai