ho gae nakaam to pachhtaen kya

ho ga.e nākām to pachhtā.eñ kyā

dostoñ ke sāmne sharmā.eñ kyā

ho rahe haiñ fail ham do saal se

ghar meñ jā kar apnā muñh dikhlā.eñ kyā

jab kisī sūrat nahīñ is se mafar

imtihāñ ke naam se ghabrā.eñ kyā

yaad kar leñ aaj thoḌā sā sabaq

master sāhab ke DanDe khā.eñ kyā

jab gurū jī ḳhud nahīñ samjhe savāl

apne shāgirdoñ ko vo samjhā.eñ kyā

paḌh nahīñ sakte to shaitānī kareñ

aa ga.e schōl meñ to jaa.eñ kyā

aao ham aapas meñ kuchh jhagḌā kareñ

khel se ab apnā dil bahlā.eñ kyā

pūchhte haiñ master ham kaun haiñ

koī batlāo ki ham batlā.eñ kyā

jab kahīñ zauq-e-suḳhan-fahmī nahīñ

'kaif' sāhab kī ġhazal ham gaa.eñ kyā

ho gae nakaam to pachhtaen kya

doston ke samne sharmaen kya

ho rahe hain fail hum do sal se

ghar mein ja kar apna munh dikhlaen kya

jab kisi surat nahin is se mafar

imtihan ke nam se ghabraen kya

yaad kar len aaj thoDa sa sabaq

master sahab ke DanDe khaen kya

jab guru ji KHud nahin samjhe sawal

apne shagirdon ko wo samjhaen kya

paDh nahin sakte to shaitani karen

aa gae school mein to jaen kya

aao hum aapas mein kuchh jhagDa karen

khel se ab apna dil bahlaen kya

puchhte hain master hum kaun hain

koi batlao ki hum batlaen kya

jab kahin zauq-e-suKHan-fahmi nahin

'kaif' sahab ki ghazal hum gaen kya