hath aankhon pe rakh lene se KHatra nahin jata

haath āñkhoñ pe rakh lene se ḳhatra nahīñ jaatā

dīvār se bhauñchāl ko rokā nahīñ jaatā

da.avoñ kī tarāzū meñ to azmat nahīñ tultī

fiite se to kirdār ko naapā nahīñ jaatā

farmān se peḌoñ pe kabhī phal nahīñ lagte

talvār se mausam koī badlā nahīñ jaatā

chor apne gharoñ meñ to nahīñ naqb lagāte

apnī hī kamā.ī ko to luuTā nahīñ jaatā

auroñ ke ḳhayālāt kī lete haiñ talāshī

aur apne garebān meñ jhāñkā nahīñ jaatā

faulād se faulād to kaT saktā hai lekin

qānūn se qānūn ko badlā nahīñ jaatā

zulmat ko ghaTā kahne se bārish nahīñ hotī

sho.aloñ ko havāoñ se to Dhāñpā nahīñ jaatā

tūfān meñ ho naav to kuchh sabr bhī aa jaa.e

sāhil pe khaḌe ho ke to Duubā nahīñ jaatā

dariyā ke kināre to pahuñch jaate haiñ pyāse

pyāsoñ ke gharoñ tak koī dariyā nahīñ jaatā

allāh jise chāhe use miltī hai 'muzaffar'

izzat ko dukānoñ se ḳharīdā nahīñ jaatā

hath aankhon pe rakh lene se KHatra nahin jata

diwar se bhaunchaal ko roka nahin jata

dawon ki taraazu mein to azmat nahin tulti

fite se to kirdar ko napa nahin jata

farman se peDon pe kabhi phal nahin lagte

talwar se mausam koi badla nahin jata

chor apne gharon mein to nahin naqb lagate

apni hi kamai ko to luTa nahin jata

auron ke KHayalat ki lete hain talashi

aur apne gareban mein jhanka nahin jata

faulad se faulad to kaT sakta hai lekin

qanun se qanun ko badla nahin jata

zulmat ko ghaTa kahne se barish nahin hoti

shoalon ko hawaon se to Dhanpa nahin jata

tufan mein ho naw to kuchh sabr bhi aa jae

sahil pe khaDe ho ke to Duba nahin jata

dariya ke kinare to pahunch jate hain pyase

pyason ke gharon tak koi dariya nahin jata

allah jise chahe use milti hai 'muzaffar'

izzat ko dukanon se KHarida nahin jata