pukarte pukarte sada hi aur ho gai

pukārte pukārte sadā hī aur ho ga.ī

qubūl hote hote har duā hī aur ho ga.ī

zarā sā ruk ke do-ghaḌī chaman pe kyā nigāh kī

badal gayā mizāj-e-gul havā hī aur ho ga.ī

ye kis ke naam kī tapish se por por jal uThe

hatheliyāñ mahak ga.iiñ hinā hī aur ho ga.ī

ḳhizāñ ne apne naam kī ridā jo gul pe Daal dī

chaman kā rañg uḌ gayā sabā hī aur ho ga.ī

ġhurūr-e-āftāb se zamīñ kā dil saham gayā

tamām bārisheñ thamīñ ghaTā hī aur ho ga.ī

ḳhamoshiyoñ ne zer-e-lab ye kyā kahā ye kyā sunā

ki kā.enāt-e-ishq kī adā hī aur ho ga.ī

jo vaqt mehrbāñ huā to ḳhaar phuul ban ga.e

ḳhizāñ kī zard zard sī qabā hī aur ho ga.ī

varaq varaq 'alīnā' ham ne zindagī se yuuñ rañgā

ki kātib-e-nasīb kī razā hī aur ho ga.ī

pukarte pukarte sada hi aur ho gai

qubul hote hote har dua hi aur ho gai

zara sa ruk ke do-ghaDi chaman pe kya nigah ki

badal gaya mizaj-e-gul hawa hi aur ho gai

ye kis ke nam ki tapish se por por jal uThe

hatheliyan mahak gain hina hi aur ho gai

KHizan ne apne nam ki rida jo gul pe Dal di

chaman ka rang uD gaya saba hi aur ho gai

ghurur-e-aftab se zamin ka dil saham gaya

tamam barishen thamin ghaTa hi aur ho gai

KHamoshiyon ne zer-e-lab ye kya kaha ye kya suna

ki kaenat-e-ishq ki ada hi aur ho gai

jo waqt mehrban hua to KHar phul ban gae

KHizan ki zard zard si qaba hi aur ho gai

waraq waraq 'alina' hum ne zindagi se yun ranga

ki katib-e-nasib ki raza hi aur ho gai