pur-kashish jalwa-e-jaanan hai KHuda KHair kare

pur-kashish jalva-e-jānāñ hai ḳhudā ḳhair kare

jiite jī maut kā sāmāñ hai ḳhudā ḳhair kare

husn-e-be-parda ḳhirāmāñ hai ḳhudā ḳhair kare

ik na.e hashr kā sāmāñ hai ḳhudā ḳhair kare

naġhma-e-zīst kī be-sāḳhta lai ko sun kar

dard phir silsila-jumbāñ hai ḳhudā ḳhair kare

har ishārā na.e afkār kā ā.īna hai

har suḳhan uqda-e-pechāñ hai ḳhudā ḳhair kare

jaane kis rang pe aa jaa.e mirā josh-e-junūñ

āmad-e-fasl-e-bahārāñ hai ḳhudā ḳhair kare

jis tasavvur se ki ghabrā.ī thī merī fitrat

phir vahī ḳhvāb-e-pareshāñ hai ḳhudā ḳhair kare

iltibās aap ko jab se hai vafāoñ pe mirī

dil ġharīq-e-ġham-o-hirmāñ hai ḳhudā ḳhair kare

banda-e-hirs-o-havas aaj hai maz.hab kā naqīb

kitnā badlā huā insān hai ḳhudā ḳhair kare

jalva-e-dost ne vo sehr kiyā hai ki 'azīm'

dil sharāroñ se farozāñ hai ḳhudā ḳhair kare

pur-kashish jalwa-e-jaanan hai KHuda KHair kare

jite ji maut ka saman hai KHuda KHair kare

husn-e-be-parda KHiraman hai KHuda KHair kare

ek nae hashr ka saman hai KHuda KHair kare

naghma-e-zist ki be-saKHta lai ko sun kar

dard phir silsila-jumban hai KHuda KHair kare

har ishaara nae afkar ka aaina hai

har suKHan uqda-e-pechan hai KHuda KHair kare

jaane kis rang pe aa jae mera josh-e-junun

aamad-e-fasl-e-bahaaran hai KHuda KHair kare

jis tasawwur se ki ghabrai thi meri fitrat

phir wahi KHwab-e-pareshan hai KHuda KHair kare

iltibas aap ko jab se hai wafaon pe meri

dil ghariq-e-gham-o-hirman hai KHuda KHair kare

banda-e-hirs-o-hawas aaj hai mazhab ka naqib

kitna badla hua insan hai KHuda KHair kare

jalwa-e-dost ne wo sehr kiya hai ki 'azim'

dil shararon se farozan hai KHuda KHair kare