purane mohalle ka sunsan aangan

purāne mohalle kā sunsān āñgan

mujhe pā ke thā kitnā hairān āñgan

ye tahzīb ko paañv chalnā sikhā.eñ

sameTe haiñ sadiyoñ ke imkān āñgan

vo dīvār se jhāñktī shoḳh āñkheñ

vo pahre pe būḌhā nigahbān āñgan

koī jast meñ paar kartā hai chaukhaT

kisī ke liye ik bayābān āñgan

kisī ke liye pāya-e-taḳht hai ye

kisī ke liye ek zindān āñgan

sunā rafta rafta khañDar ho rahe haiñ

vo ābād galiyāñ vo gunjān āñgan

kidhar jaa.eñ tahzīb kī hijratoñ meñ

ye būḌhe daraḳht aur ye vīrān āñgan

purane mohalle ka sunsan aangan

mujhe pa ke tha kitna hairan aangan

ye tahzib ko panw chalna sikhaen

sameTe hain sadiyon ke imkan aangan

wo diwar se jhankti shoKH aankhen

wo pahre pe buDha nigahban aangan

koi jast mein par karta hai chaukhaT

kisi ke liye ek bayaban aangan

kisi ke liye paya-e-taKHt hai ye

kisi ke liye ek zindan aangan

suna rafta rafta khanDar ho rahe hain

wo aabaad galiyan wo gunjaan aangan

kidhar jaen tahzib ki hijraton mein

ye buDhe daraKHt aur ye viran aangan