puchhte hain haal taDpane ke baad

pūchhte haiñ haal taḌpāne ke ba.ad

ye karam hai har sitam Dhāne ke ba.ad

ġham ke saa.e se milā hai dil ko nuur

bijlī kaundī hai ghaTā chhā jaane ke ba.ad

ruḳh to kashtī kā hai sāhil kī taraf

dekhiye kyā biite Takrāne ke ba.ad

allāh allāh khīñchnā dāmān-e-dil

ziist ke kāñToñ meñ uljhāne ke ba.ad

mil sakā hai un ke ġham kā kuchh maza

bahjat-e-kaunain Thukrāne ke ba.ad

haa.e vo bebāk ġhārat-gar nigāh

jis ne luuTā dil ko chauñkāne ke ba.ad

barq-vash jalva bhī koī jalva hai

aah ye Dhalkānā tarsāne ke ba.ad

toḌ hī Daalo dil-e-kam-baḳht ko

joḌne baiThe ho darkāne ke ba.ad

aur bhaḌkāte ho is paanī se aag

ro rahe ho mujh ko sulgāne ke ba.ad

puchhte hain haal taDpane ke baad

ye karam hai har sitam Dhane ke baad

gham ke sae se mila hai dil ko nur

bijli kaundi hai ghaTa chha jaane ke baad

ruKH to kashti ka hai sahil ki taraf

dekhiye kya bite Takrane ke baad

allah allah khinchna daman-e-dil

zist ke kanTon mein uljhane ke baad

mil saka hai un ke gham ka kuchh maza

bahjat-e-kaunain Thukrane ke baad

hae wo bebak ghaarat-gar nigah

jis ne luTa dil ko chaunkane ke baad

barq-wash jalwa bhi koi jalwa hai

aah ye Dhalkana tarsane ke baad

toD hi Dalo dil-e-kam-baKHt ko

joDne baiThe ho darkane ke baad

aur bhaDkate ho is pani se aag

ro rahe ho mujh ko sulgane ke baad