puchhte kya ho jo haal-e-shab-e-tanhai tha

pūchhte kyā ho jo hāl-e-shab-e-tanhā.ī thā

ruḳhsat-e-sabr thī yā tark-e-shakebā.ī thā

shab-e-furqat meñ dil-e-ġham-zada bhī paas na thā

vo bhī kyā raat thī kyā ālam-e-tanhā.ī thā

maiñ thā yā dīda-e-ḳhūñ-nāba-fishānī shab-e-hijr

un ko vaañ mashġhala-e-anjuman-ārā.ī thā

pāra-hā-e-dil-e-ḳhūnīñ kī talab thī paiham

shab jo āñkhoñ meñ mirī zauq-e-ḳhud-ārā.ī thā

rahm to ek taraf pāya-shanāsī dekho

qais ko kahte haiñ majnūn thā sahrā.ī thā

āñkheñ qātil sahī par zinda jo karnā hotā

lab pe ai jaan tū e'jāz masīhā.ī thā

ḳhuun ro ro diye bas do hī qadam meñ chhāle

yaañ vahī hausla-e-bādiya-paimā.ī thā

dushman-e-jāñ the udhar hijr meñ dard-o-ġham-o-rañj

aur idhar ek akelā tirā shaidā.ī thā

uñgliyāñ uThtī thiiñ mizhgāñ kī usī ruḳh paiham

jis taraf bazm meñ vo kāfir-e-tarsā.ī thā

kaun is raah se guzrā hai ki har naqsh-e-qadam

chashm-e-āshiq kī tarah us kā tamāshā.ī thā

ḳhuub vaqt aa.e nakīrain jazā degā ḳhudā

lahd-e-tīra meñ bhī kyā ālam-e-tanhā.ī thā

ham ne bhī hazrat-shiblī kī ziyārat kī thī

yuuñ to zāhir meñ muqaddas thā pa shaidā.ī thā

puchhte kya ho jo haal-e-shab-e-tanhai tha

ruKHsat-e-sabr thi ya tark-e-shakebai tha

shab-e-furqat mein dil-e-gham-zada bhi pas na tha

wo bhi kya raat thi kya aalam-e-tanhai tha

main tha ya dida-e-KHun-naba-fishani shab-e-hijr

un ko wan mashghala-e-anjuman-arai tha

para-ha-e-dil-e-KHunin ki talab thi paiham

shab jo aankhon mein meri zauq-e-KHud-arai tha

rahm to ek taraf paya-shanasi dekho

qais ko kahte hain majnun tha sahrai tha

aankhen qatil sahi par zinda jo karna hota

lab pe ai jaan tu e'jaz masihai tha

KHun ro ro diye bas do hi qadam mein chhaale

yan wahi hausla-e-baadiya-paimai tha

dushman-e-jaan the udhar hijr mein dard-o-gham-o-ranj

aur idhar ek akela tera shaidai tha

ungliyan uThti thin mizhgan ki usi ruKH paiham

jis taraf bazm mein wo kafir-e-tarsai tha

kaun is rah se guzra hai ki har naqsh-e-qadam

chashm-e-ashiq ki tarah us ka tamashai tha

KHub waqt aae nakirain jaza dega KHuda

lahd-e-tira mein bhi kya aalam-e-tanhai tha

hum ne bhi hazrat-shibli ki ziyarat ki thi

yun to zahir mein muqaddas tha pa shaidai tha