pyar ishq hamdardi aur dosti sazish

pyaar ishq hamdardī aur dostī sāzish

mere saath hotī hai roz ik na.ī sāzish

aane vaale lamhoñ ke ham mizāj-dāñ Thahre

kaise kar sakegī phir ham se zindagī sāzish

vo ḳhud-e'timādī kā aa.ina rahā hogā

varna ek muddat tak muntazir rahī sāzish

le chalī haiñ sāhil par mujh ko sar-phirī maujeñ

jaise ye bhī tūfāñ kī ho koī na.ī sāzish

maiñ ghane añdheroñ kā saaya saath rakhtā huuñ

mere saath kar jaa.e aur raushnī sāzish

us kī apnī chāloñ ne us pe vaar kar Daalā

vaqt ke badalte hī ruḳh badal ga.ī sāzish

'akmal' aaj kā insāñ kitnā be-tahammul hai

dil meñ kuchh ḳhalish ubhrī aur daaġh dī sāzish

pyar ishq hamdardi aur dosti sazish

mere sath hoti hai roz ek nai sazish

aane wale lamhon ke hum mizaj-dan Thahre

kaise kar sakegi phir hum se zindagi sazish

wo KHud-e'timadi ka aaina raha hoga

warna ek muddat tak muntazir rahi sazish

le chali hain sahil par mujh ko sar-phiri maujen

jaise ye bhi tufan ki ho koi nai sazish

main ghane andheron ka saya sath rakhta hun

mere sath kar jae aur raushni sazish

us ki apni chaalon ne us pe war kar Dala

waqt ke badalte hi ruKH badal gai sazish

'akmal' aaj ka insan kitna be-tahammul hai

dil mein kuchh KHalish ubhri aur dagh di sazish