pyar ki tere nishani hae hae

pyaar kī tere nishānī haa.e haa.e

merī afsurda javānī haa.e haa.e

jal rahā huuñ kab se apnī aag meñ

soz-e-ālām-e-nihānī haa.e haa.e

kah rahe haiñ ye mire mū-e-safed

kyā huī terī javānī haa.e haa.e

sāqiyā ḳhālis pilā ḳhālis pilā

aag meñ shāmil ho paanī haa.e haa.e

thā koī pahlū meñ gardish meñ thā jaam

kyā thā daur-e-shādmānī haa.e haa.e

dil ḳhushī kā thā jo gahvāra kabhī

ġham kī hai ab rājdhānī haa.e haa.e

pūchhnā us kā vo mujh se hāl-e-dil

mere ashkoñ kī ravānī haa.e haa.e

ab vo sub.hoñ meñ kahāñ hai dilkashī

ab kahāñ shāmeñ suhānī haa.e haa.e

un ke lab par bhī tabassum aa gayā

'soz' kī shīrīñ-bayānī haa.e haa.e

pyar ki tere nishani hae hae

meri afsurda jawani hae hae

jal raha hun kab se apni aag mein

soz-e-alam-e-nihani hae hae

kah rahe hain ye mere mu-e-safed

kya hui teri jawani hae hae

saqiya KHalis pila KHalis pila

aag mein shamil ho pani hae hae

tha koi pahlu mein gardish mein tha jam

kya tha daur-e-shadmani hae hae

dil KHushi ka tha jo gahwara kabhi

gham ki hai ab rajdhani hae hae

puchhna us ka wo mujh se haal-e-dil

mere ashkon ki rawani hae hae

ab wo subhon mein kahan hai dilkashi

ab kahan shamen suhani hae hae

un ke lab par bhi tabassum aa gaya

'soz' ki shirin-bayani hae hae