pyasi thi ye KHud mere lahu ki

pyāsī thī ye ḳhud mire lahū kī

thī tez chhurī rag-e-gulū kī

dil kho ke na maiñ ne justujū kī

samjhā thā ki buuñd thī lahū kī

tum paas jo aa.e kho ga.e ham

jab tum na mile to justujū kī

sab zaḳhm ke Tāñke saath TuuTe

hājat na rahī koī rafū kī

ḳhud kho ga.e ham jahāñ meñ āḳhir

is had pe kisī kī justujū kī

dekhā ki zamīñ se aag niklī

jab buuñd Tapak paḌī lahū kī

roī vahāñ sham.a yaañ hañse phuul

vo qabr mirī thī ye adū kī

vo sāmne aa.e ġhash hue ye

muusā kī nazar kahāñ pe chūkī

tīroñ pe kisī ke baañT bhī duuñ

khaa.ī thī qasam isī lahū kī

is daaġh ko maiñ ne dil meñ rakkhā

dushman ne na jis kī aarzū kī

'jāved' vo laash kyuuñ uThā.eñ

marzī bhī to pūchh leñ adū kī

pyasi thi ye KHud mere lahu ki

thi tez chhuri rag-e-gulu ki

dil kho ke na main ne justuju ki

samjha tha ki bund thi lahu ki

tum pas jo aae kho gae hum

jab tum na mile to justuju ki

sab zaKHm ke Tanke sath TuTe

hajat na rahi koi rafu ki

KHud kho gae hum jahan mein aaKHir

is had pe kisi ki justuju ki

dekha ki zamin se aag nikli

jab bund Tapak paDi lahu ki

roi wahan shama yan hanse phul

wo qabr meri thi ye adu ki

wo samne aae ghash hue ye

musa ki nazar kahan pe chuki

tiron pe kisi ke banT bhi dun

khai thi qasam isi lahu ki

is dagh ko main ne dil mein rakkha

dushman ne na jis ki aarzu ki

'jawed' wo lash kyun uThaen

marzi bhi to puchh len adu ki