qarun uTha ke sar pe suna ganj le chala

qārūñ uThā ke sar pe sunā ganj le chalā

duniyā se kyā baḳhīl ba-juz rañj le chalā

minnat thī bosa-e-lab-e-shīrīñ ki dil mirā

mujh ko sū-e-mazār-e-shakar ganj le chalā

saaqī sambhāltā hai to jaldī mujhe sambhāl

varna uḌā ke paañ nasha-e-banj le chalā

dauḌā ke haath chhātī pe ham un kī yuuñ phire

jaise koī chor aa ke ho nāranj le chalā

chausar kā lutf ye hai ki jis vaqt po paḌe

ham bar-chahār bole to bar-panj le chalā

jis dam 'zafar' ne paḌh ke ġhazal haath se rakhī

āñkhoñ pe rakh har ek suḳhan-sanj le chalā

qarun uTha ke sar pe suna ganj le chala

duniya se kya baKHil ba-juz ranj le chala

minnat thi bosa-e-lab-e-shirin ki dil mera

mujh ko su-e-mazar-e-shakar ganj le chala

saqi sambhaalta hai to jaldi mujhe sambhaal

warna uDa ke pan nasha-e-banj le chala

dauDa ke hath chhati pe hum un ki yun phire

jaise koi chor aa ke ho naranj le chala

chausar ka lutf ye hai ki jis waqt po paDe

hum bar-chahaar bole to bar-panj le chala

jis dam 'zafar' ne paDh ke ghazal hath se rakhi

aankhon pe rakh har ek suKHan-sanj le chala