qasid-e-KHush-fal laya uske aane ki KHabar

qāsid-e-ḳhush-fāl laayā us ke aane kī ḳhabar

dil to ḳhush kartā hai baare ye bahāne kī ḳhabar

vo but-e-be-raham ham se yuuñ judā.ī kar gayā

haa.e kis kāfir ko thī is bad zamāne kī ḳhabar

bulbulo do din ġhanīmat hai ye fursat aish kī

baaġh se hai aaj kal hī gul ke jaane kī ḳhabar

tā-abad ḳhālī rahe yā-rab diloñ meñ us kī jā

jo koī laave mire ghar us ke aane kī ḳhabar

mere dil ko nisbat-e-farhād-o-majnūñ aar hai

duur ho mujh ko nahīñ hai is divāne kī ḳhabar

kaun kis kī ishq ke zindāñ meñ ġham-ḳhvārī kare

ḳhūn-e-dil letā hai mere piine khāne kī ḳhabar

aa gayā nādān tū us ke fareb-e-lutf meñ

mujh ko 'hasrat' sab thī us ke dil lubhāne kī ḳhabar

qasid-e-KHush-fal laya us ke aane ki KHabar

dil to KHush karta hai bare ye bahane ki KHabar

wo but-e-be-raham hum se yun judai kar gaya

hae kis kafir ko thi is bad zamane ki KHabar

bulbulo do din ghanimat hai ye fursat aish ki

bagh se hai aaj kal hi gul ke jaane ki KHabar

ta-abad KHali rahe ya-rab dilon mein us ki ja

jo koi lawe mere ghar us ke aane ki KHabar

mere dil ko nisbat-e-farhad-o-majnun aar hai

dur ho mujh ko nahin hai is diwane ki KHabar

kaun kis ki ishq ke zindan mein gham-KHwari kare

KHun-e-dil leta hai mere pine khane ki KHabar

aa gaya nadan tu us ke fareb-e-lutf mein

mujh ko 'hasrat' sab thi us ke dil lubhane ki KHabar