qadam insan ka rah-e-dahr mein tharra hi jata hai

qadam insāñ kā rāh-e-dahr meñ tharrā hī jaatā hai

chale kitnā hī koī bach ke Thokar khā hī jaatā hai

nazar ho ḳhvāh kitnī hī haqā.iq-āshnā phir bhī

hujūm-e-kashmakash meñ aadmī ghabrā hī jaatā hai

ḳhilāf-e-maslahat maiñ bhī samajhtā huuñ magar nāseh

vo aate haiñ to chehre par taġhayyur aa hī jaatā hai

havā.eñ zor kitnā hī lagā.eñ āñdhiyāñ ban kar

magar jo ghir ke aatā hai vo bādal chhā hī jaatā hai

shikāyat kyuuñ ise kahte ho ye fitrat hai insāñ kī

musībat meñ ḳhayāl-e-aish-e-rafta aa hī jaatā hai

shagūfoñ par bhī aatī haiñ balā.eñ yuuñ to kahne ko

magar jo phuul ban jaatā hai vo kumhlā hī jaatā hai

samajhtī haiñ ma.āl-e-gul magar kyā zor-e-fitrat hai

sahar hote hī kaliyoñ ko tabassum aa hī jaatā hai

qadam insan ka rah-e-dahr mein tharra hi jata hai

chale kitna hi koi bach ke Thokar kha hi jata hai

nazar ho KHwah kitni hi haqaiq-ashna phir bhi

hujum-e-kashmakash mein aadmi ghabra hi jata hai

KHilaf-e-maslahat main bhi samajhta hun magar naseh

wo aate hain to chehre par taghayyur aa hi jata hai

hawaen zor kitna hi lagaen aandhiyan ban kar

magar jo ghir ke aata hai wo baadal chha hi jata hai

shikayat kyun ise kahte ho ye fitrat hai insan ki

musibat mein KHayal-e-aish-e-rafta aa hi jata hai

shagufon par bhi aati hain balaen yun to kahne ko

magar jo phul ban jata hai wo kumhla hi jata hai

samajhti hain maal-e-gul magar kya zor-e-fitrat hai

sahar hote hi kaliyon ko tabassum aa hi jata hai