qadam yun be-KHatar ho kar na mai-KHane mein rakh dena

qadam yuuñ be-ḳhatar ho kar na mai-ḳhāne meñ rakh denā

bahut mushkil hai jaan o dil ko nazrāne meñ rakh denā

sunā hai hazrat-e-vā.iz idhar tashrīf lā.eñge

zarā us kāsa-e-gardūñ ko mai-ḳhāne meñ rakh denā

butoñ ke dil meñ yuuñ shāyad ḳhudā kā ḳhauf paidā ho

ye mere dil ke TukḌe jā ke but-ḳhāne meñ rakh denā

yahāñ ai dil farishtoñ kā bhī zohra aab hotā hai

qadam āsāñ nahīñ ulfat ke vīrāne meñ rakh denā

chalā hai ghar ko dīvāna uḌā kar ḳhaak sahrā kī

ġhubār-e-ḳhātir-e-ahbāb kāshāne meñ rakh denā

ziyārat ko vo dasht-e-najd kā jāñ-bāz aa.egā

zarā dam-bhar ko merī naash vīrāne meñ rakh denā

ba-faiz-e-hazrat-e-nāseh huī taufīq tauba kī

mirā jām-e-shikasta un ke shukrāne meñ rakh denā

munāfī thā ye ai mansūr dastūr-e-amānat ke

kisī kī baat ko yuuñ apne begāne meñ rakh denā

pilā.ī hai jo 'vāsif' ko mai-e-mard-āzmā saaqī

to kuchh shān-e-ḳhudī bhī apne dīvāne meñ rakh denā

qadam yun be-KHatar ho kar na mai-KHane mein rakh dena

bahut mushkil hai jaan o dil ko nazrane mein rakh dena

suna hai hazrat-e-waiz idhar tashrif laenge

zara us kasa-e-gardun ko mai-KHane mein rakh dena

buton ke dil mein yun shayad KHuda ka KHauf paida ho

ye mere dil ke TukDe ja ke but-KHane mein rakh dena

yahan ai dil farishton ka bhi zohra aab hota hai

qadam aasan nahin ulfat ke virane mein rakh dena

chala hai ghar ko diwana uDa kar KHak sahra ki

ghubar-e-KHatir-e-ahbab kashane mein rakh dena

ziyarat ko wo dasht-e-najd ka jaan-baz aaega

zara dam-bhar ko meri nash virane mein rakh dena

ba-faiz-e-hazrat-e-naseh hui taufiq tauba ki

mera jam-e-shikasta un ke shukrane mein rakh dena

munafi tha ye ai mansur dastur-e-amanat ke

kisi ki baat ko yun apne begane mein rakh dena

pilai hai jo 'wasif' ko mai-e-mard-azma saqi

to kuchh shan-e-KHudi bhi apne diwane mein rakh dena