qadmon ka rah-e-dil pe nishan koi nahin tha

qadmoñ kā rah-e-dil pe nishāñ koī nahīñ thā

muddat se yahāñ gasht-kunāñ koī nahīñ thā

tujh ko to mire dost hai tanhā.ī mayassar

maiñ ne vahāñ kaaTī hai jahāñ koī nahīñ thā

vaise to bahut bhiiḌ thī is ḳhāna-e-dil meñ

lekin mire matlab kā yahāñ koī nahīñ thā

koī bhī nahīñ thā jise ham dil kī sunāte

koī bhī nahīñ thā mirī jaañ koī nahīñ thā

tū chhoḌ gayā tab bhī ziyāñ koī nahīñ hai

tū saath bhī hotā to ziyāñ koī nahīñ thā

tū vahm thā merā ki koī Duub rahā hai

tū sach meñ sar-e-āb-e-ravāñ koī nahīñ thā

qadmon ka rah-e-dil pe nishan koi nahin tha

muddat se yahan gasht-kunan koi nahin tha

tujh ko to mere dost hai tanhai mayassar

main ne wahan kaTi hai jahan koi nahin tha

waise to bahut bhiD thi is KHana-e-dil mein

lekin mere matlab ka yahan koi nahin tha

koi bhi nahin tha jise hum dil ki sunate

koi bhi nahin tha meri jaan koi nahin tha

tu chhoD gaya tab bhi ziyan koi nahin hai

tu sath bhi hota to ziyan koi nahin tha

tu wahm tha mera ki koi Dub raha hai

tu sach mein sar-e-ab-e-rawan koi nahin tha