qafas ko jaante hain yas aashiyan apna

qafas ko jānte haiñ 'yās' āshiyāñ apnā

makān apnā zamīn apnī āsmāñ apnā

havā-e-tund meñ Thahrā na āshiyāñ apnā

charāġh jal na sakā zer-e-āsmāñ apnā

sunā hai rañg zamāna kā e'tibār nahīñ

badal na jaa.e yaqīñ se kahīñ gumāñ apnā

bas ek sāya-e-dīvār-e-yār kyā kam hai

uThā le sar se mire saaya āsmāñ apnā

maze ke saath hoñ andoh-o-ġham to kyā kahnā

yaqīñ na ho to kare koī imtihāñ apnā

sharīk-e-hāl huā hai jo faqr-o-fāqa meñ

gaḌhegā saath hī kyā apne mehmāñ apnā

ajiib bhūl-bhulayyāñ hai manzil-e-hastī

bhaTaktā-phirtā hai gum-gashta kārvāñ apnā

kidhar se aatī hai yūsuf kī bū-e-mastāna

ḳharāb phirtā hai jañgal meñ kārvāñ apnā

jaras ne muzhda-e-manzil sunā ke chauñkāyā

nikal chalā thā dabe paañv kārvāñ apnā

ḳhudā kisī ko bhī ye ḳhvāb-e-bad na dikhlā.e

qafas ke sāmne jaltā hai āshiyāñ apnā

hamāre qatl kā va.ada hai ġhair ke hāthoñ

ajiib shart pe Thahrā hai imtihāñ apnā

hamārā rañg-e-suḳhan 'yās' koī kyā jaane

sivā.e 'ātish' huā kaun ham-zabāñ apnā

qafas ko jaante hain 'yas' aashiyan apna

makan apna zamin apni aasman apna

hawa-e-tund mein Thahra na aashiyan apna

charagh jal na saka zer-e-asman apna

suna hai rang zamana ka e'tibar nahin

badal na jae yaqin se kahin guman apna

bas ek saya-e-diwar-e-yar kya kam hai

uTha le sar se mere saya aasman apna

maze ke sath hon andoh-o-gham to kya kahna

yaqin na ho to kare koi imtihan apna

sharik-e-haal hua hai jo faqr-o-faqa mein

gaDhega sath hi kya apne mehman apna

ajib bhul-bhulayyan hai manzil-e-hasti

bhaTakta-phirta hai gum-gashta karwan apna

kidhar se aati hai yusuf ki bu-e-mastana

KHarab phirta hai jangal mein karwan apna

jaras ne muzhda-e-manzil suna ke chaunkaya

nikal chala tha dabe panw karwan apna

KHuda kisi ko bhi ye KHwab-e-bad na dikhlae

qafas ke samne jalta hai aashiyan apna

hamare qatl ka wada hai ghair ke hathon

ajib shart pe Thahra hai imtihan apna

hamara rang-e-suKHan 'yas' koi kya jaane

siwae 'atish' hua kaun ham-zaban apna