qaid mein guzregi jo umr baDe kaam ki thi

qaid meñ guzregī jo umr baḌe kaam kī thī

par maiñ kyā kartī ki zanjīr tire naam kī thī

jis ke māthe pe mire baḳht kā taara chamkā

chāñd ke Dūbne kī baat usī shaam kī thī

maiñ ne hāthoñ ko hī patvār banāyā varna

ek TuuTī huī kashtī mire kis kaam kī thī

vo kahānī ki abhī sūiyāñ niklīñ bhī na thiiñ

fikr har shaḳhs ko shahzādī ke anjām kī thī

ye havā kaise uḌā le ga.ī āñchal merā

yuuñ satāne kī to aadat mire ghanshyām kī thī

bojh uThāte hue phirtī hai hamārā ab tak

ai zamīñ-māñ tirī ye umr to ārām kī thī

qaid mein guzregi jo umr baDe kaam ki thi

par main kya karti ki zanjir tere nam ki thi

jis ke mathe pe mere baKHt ka tara chamka

chand ke Dubne ki baat usi sham ki thi

main ne hathon ko hi patwar banaya warna

ek TuTi hui kashti mere kis kaam ki thi

wo kahani ki abhi suiyan niklin bhi na thin

fikr har shaKHs ko shahzadi ke anjam ki thi

ye hawa kaise uDa le gai aanchal mera

yun satane ki to aadat mere ghanshyam ki thi

bojh uThate hue phirti hai hamara ab tak

ai zamin-man teri ye umr to aaram ki thi