qarine se ajab aarasta qatil ki mahfil hai

qarīne se ajab ārāsta qātil kī mahfil hai

jahāñ sar chāhiye sar hai jahāñ dil chāhiye dil hai

har ik ke vāste kab ishq kī dushvār manzil hai

jise āsāñ hai āsāñ hai jise mushkil hai mushkil hai

zahe taqdīr kis ārām o rāhat se vo bismil hai

ki jis ke sar kā takiya der se zānū-e-qātil hai

tarīq-e-ishq kuchh āsān hai kuchh ham ko mushkil hai

idhar rahbar udhar rahzan yahī manzil-ba-manzil hai

mujhe tujh se rukāvaT aur tū ġhairoñ pe maa.il hai

mirā dil ab tirā dil hai tirā dil ab mirā dil hai

baḌhā dil is qadar fart-e-ḳhushī se vasl kī shab ko

mujhe ye vahm thā pahlū meñ ye takiya hai yā dil hai

tirī talvār ke qurbān ai saffāk kyā kahnā

idhar kushte pe kushta hai udhar bismil pe bismil hai

adam meñ le chalā hai rahnumā-e-ishq kyā mujh ko

yahī kahtā hai aa pahuñche haiñ thoḌī duur manzil hai

unheñ jab mehrbāñ pā kar savāl-e-vasl kar baiThā

dabī āvāz se sharmā ke vo bole ye mushkil hai

sitam bhī ho to mujh par ho jafā bhī ho to mujh par ho

mujhe is rashk ne maarā vo kyuuñ aalam kā qātil hai

masīhā ne tire bīmār ko dekhā to farmāyā

na ye jiine ke qābil hai na ye marne ke qābil hai

zabardastī to dekho haath rakh kar mere siine par

vo kis da.ave se kahte haiñ hamārā hī to ye dil hai

hamāre dil meñ aa kar sair dekho ḳhūb-rūyoñ kī

ki indr kā akhāḌā hai parī-zādoñ kī mahfil hai

madārij ishq ke tai ho sakeñ ye ho nahīñ saktā

zamīñ se arsh tak ai be-ḳhabar manzil-ba-manzil hai

jhiḌakte ho mujhe kyuuñ duur hī se paas aane do

baḌhā kar haath dil detā huuñ tum samjhe ho saa.il hai

sunā bhī tū ne ai dil kyā sadā aatī hai mahshar meñ

yahī din imtihāñ kā hai hamāre kaun shāmil hai

uḌāte haiñ maze duniyā ke ham ai 'dāġh' ghar baiThe

dakan meñ ab to afzalganj apnī aish manzil hai

qarine se ajab aarasta qatil ki mahfil hai

jahan sar chahiye sar hai jahan dil chahiye dil hai

har ek ke waste kab ishq ki dushwar manzil hai

jise aasan hai aasan hai jise mushkil hai mushkil hai

zahe taqdir kis aaram o rahat se wo bismil hai

ki jis ke sar ka takiya der se zanu-e-qatil hai

tariq-e-ishq kuchh aasan hai kuchh hum ko mushkil hai

idhar rahbar udhar rahzan yahi manzil-ba-manzil hai

mujhe tujh se rukawaT aur tu ghairon pe mail hai

mera dil ab tera dil hai tera dil ab mera dil hai

baDha dil is qadar fart-e-KHushi se wasl ki shab ko

mujhe ye wahm tha pahlu mein ye takiya hai ya dil hai

teri talwar ke qurban ai saffak kya kahna

idhar kushte pe kushta hai udhar bismil pe bismil hai

adam mein le chala hai rahnuma-e-ishq kya mujh ko

yahi kahta hai aa pahunche hain thoDi dur manzil hai

unhen jab mehrban pa kar sawal-e-wasl kar baiTha

dabi aawaz se sharma ke wo bole ye mushkil hai

sitam bhi ho to mujh par ho jafa bhi ho to mujh par ho

mujhe is rashk ne mara wo kyun aalam ka qatil hai

masiha ne tere bimar ko dekha to farmaya

na ye jine ke qabil hai na ye marne ke qabil hai

zabardasti to dekho hath rakh kar mere sine par

wo kis dawe se kahte hain hamara hi to ye dil hai

hamare dil mein aa kar sair dekho KHub-ruyon ki

ki indr ka akhaDa hai pari-zadon ki mahfil hai

madarij ishq ke tai ho saken ye ho nahin sakta

zamin se arsh tak ai be-KHabar manzil-ba-manzil hai

jhiDakte ho mujhe kyun dur hi se pas aane do

baDha kar hath dil deta hun tum samjhe ho sail hai

suna bhi tu ne ai dil kya sada aati hai mahshar mein

yahi din imtihan ka hai hamare kaun shamil hai

uDate hain maze duniya ke hum ai 'dagh' ghar baiThe

dakan mein ab to afzalganj apni aish manzil hai