qasam KHuda ki bulandi se guftugu karte

qasam ḳhudā kī bulandī se guftugū karte

uḌaan bharne se pahle agar vuzū karte

fanā kā ḳhauf rahā raat bhar mohalle par

faqīr guzre the kal shaam allāh-hū karte

hamāre saaye zamīnoñ meñ dhañs chuke the yahāñ

safar kā azm bhalā kaise chaar sū karte

kisī pe dhuup ke chilke na Dālte hargiz

ik aa.ina bhī agar ḳhud ke rū-ba-rū karte

jhukī jabīn kā me.ayār baḌh gayā hotā

gar apne aap ko masjūd qibla-rū karte

abhī huī haiñ kahāñ pattharoñ kī barsāteñ

abhī se phirne lage kyuuñ lahū lahū karte

jo log mom kī dastār bāñdhe phirte hai

zarā sī der to suraj se guftugū karte

kiran ke dhāge kā ham ko agar sirā miltā

havā.eñ siite ḳhalāoñ ko ham rafū karte

'navāz' is liye ḳhāmoshiyoñ se lipTe haiñ

zabān khultī to paidā na.e adū karte

qasam KHuda ki bulandi se guftugu karte

uDan bharne se pahle agar wuzu karte

fana ka KHauf raha raat bhar mohalle par

faqir guzre the kal sham allah-hu karte

hamare saye zaminon mein dhans chuke the yahan

safar ka azm bhala kaise chaar su karte

kisi pe dhup ke chilke na Dalte hargiz

ek aaina bhi agar KHud ke ru-ba-ru karte

jhuki jabin ka meayar baDh gaya hota

gar apne aap ko masjud qibla-ru karte

abhi hui hain kahan pattharon ki barsaten

abhi se phirne lage kyun lahu lahu karte

jo log mom ki dastar bandhe phirte hai

zara si der to suraj se guftugu karte

kiran ke dhage ka hum ko agar sira milta

hawaen site KHalaon ko hum rafu karte

'nawaz' is liye KHamoshiyon se lipTe hain

zaban khulti to paida nae adu karte