qatra dariya-e-ashnai hai

qatra dariyā-e-āshnā.ī hai

kyā tirī shān-e-kibriyā.ī hai

terī marzī jo dekh paa.ī hai

ḳhalish-e-dard kī ban aa.ī hai

vahm ko bhī tirā nishāñ na milā

nā-rasā.ī sī nā-rasā.ī hai

kaun dil hai jo dardmand nahīñ

kyā tire dard kī ḳhudā.ī hai

jalva-e-yār kā bhikārī huuñ

shash-jihat kāsa-e-gadā.ī hai

maut aatī hai tum na aaoge

tum na aa.e to maut aa.ī hai

bichh ga.e rāh-e-yār meñ kāñTe

kis ko uzr-e-barhana-pā.ī hai

tark-e-ummīd bas kī baat nahīñ

varna ummīd kab bar aa.ī hai

muzhda-e-jannat-e-visāl hai maut

zindagī mahshar-e-judā.ī hai

aarzū phir hai dar-pa-e-tadbīr

sa.i-e-nākām kī duhā.ī hai

maut hī saath de to de 'fānī'

umr ko uzr-e-bevafā.ī hai

qatra dariya-e-ashnai hai

kya teri shan-e-kibriyai hai

teri marzi jo dekh pai hai

KHalish-e-dard ki ban aai hai

wahm ko bhi tera nishan na mila

na-rasai si na-rasai hai

kaun dil hai jo dardmand nahin

kya tere dard ki KHudai hai

jalwa-e-yar ka bhikari hun

shash-jihat kasa-e-gadai hai

maut aati hai tum na aaoge

tum na aae to maut aai hai

bichh gae rah-e-yar mein kanTe

kis ko uzr-e-barhana-pai hai

tark-e-ummid bas ki baat nahin

warna ummid kab bar aai hai

muzhda-e-jannat-e-visal hai maut

zindagi mahshar-e-judai hai

aarzu phir hai dar-pa-e-tadbir

sai-e-nakaam ki duhai hai

maut hi sath de to de 'fani'

umr ko uzr-e-bewafai hai