qatra-e-KHun-e-jigar ko chashm-e-tar tak le gae

qatra-e-ḳhūn-e-jigar ko chashm-e-tar tak le ga.e

ab ke aa.e aise bādal merā ghar tak le ga.e

kam hoñ kuchh bechainiyāñ shāyad dar-o-dīvār kī

ham tire kūche ke ik patthar ko ghar tak le ga.e

tab ye jaanā sar barahna kar diyā hālāt ne

be-ḳhayālī meñ jo ham hāthoñ ko sar tak le ga.e

chhāñv meñ jis kī milā karte rahe ham muddatoñ

mas.ala dil kā usī būḌhe shajar tak le ga.e

kah diyā sab kuchh ba-shakl-e-sher un kī bazm meñ

nāla-e-dil-soz ko ham yuuñ asar tak le ga.e

tum ko jaanā thā to jaate ye ġhazab kaisā kiyā

ġham chhupā kar muskurāne kā hunar tak le ga.e

tab kahīñ jā kar hameñ 'mārūf' aaya hai qarār

jab jabīn-e-shauq ko ham sang-e-dar tak le ga.e

qatra-e-KHun-e-jigar ko chashm-e-tar tak le gae

ab ke aae aise baadal mera ghar tak le gae

kam hon kuchh bechainiyan shayad dar-o-diwar ki

hum tere kuche ke ek patthar ko ghar tak le gae

tab ye jaana sar barahna kar diya haalat ne

be-KHayali mein jo hum hathon ko sar tak le gae

chhanw mein jis ki mila karte rahe hum muddaton

masala dil ka usi buDhe shajar tak le gae

kah diya sab kuchh ba-shakl-e-sher un ki bazm mein

nala-e-dil-soz ko hum yun asar tak le gae

tum ko jaana tha to jate ye ghazab kaisa kiya

gham chhupa kar muskurane ka hunar tak le gae

tab kahin ja kar hamein 'maruf' aaya hai qarar

jab jabin-e-shauq ko hum sang-e-dar tak le gae