qayamat hai ki sun laila ka dasht-e-qais mein aana

qayāmat hai ki sun lailā kā dasht-e-qais meñ aanā

ta'ajjub se vo bolā yuuñ bhī hotā hai zamāne meñ

dil-e-nāzuk pe us ke rahm aatā hai mujhe 'ġhālib'

na kar sargarm us kāfir ko ulfat āzmāne meñ

sarishk āshufta-sar thā qatra-zan mizhgāñ se jaane meñ

rahe yaañ shoḳhī-e-raftār se pā āstāne meñ

hujūm-e-muzhda-e-dīdār va pardāz-e-tamāshā hā

gul-e-iqbāl-e-ḳhas hai chashm-e-bulbul āshiyāne meñ

huī ye be-ḳhudī chashm-o-zabāñ ko tere jalve se

ki tuutī qufl-e-zang-ālūda hai ā.īna-ḳhāne meñ

tire kūche meñ hai mushāta-e-vāmāñdgī qāsid

par-e-parvāz zulf-e-nāz hai hudhud ke shāne meñ

kujā mā'zūlī-e-ā.īna ko tark-e-ḳhud-ārā.ī

namad dar-āb hai ai saada purkār is bahāne meñ

ba-hukm-e-'ijz abrū-e-mah-e-nau hairat-īmā hai

ki yaañ gum kar jabīn-e-sajda-farsā āstāne meñ

qayamat hai ki sun laila ka dasht-e-qais mein aana

ta'ajjub se wo bola yun bhi hota hai zamane mein

dil-e-nazuk pe us ke rahm aata hai mujhe 'ghaalib'

na kar sargarm us kafir ko ulfat aazmane mein

sarishk aashufta-sar tha qatra-zan mizhgan se jaane mein

rahe yan shoKHi-e-raftar se pa aastane mein

hujum-e-muzhda-e-didar wa pardaz-e-tamasha ha

gul-e-iqbaal-e-KHas hai chashm-e-bulbul aashiyane mein

hui ye be-KHudi chashm-o-zaban ko tere jalwe se

ki tuti qufl-e-zang-aluda hai aaina-KHane mein

tere kuche mein hai mushata-e-wamandgi qasid

par-e-parwaz zulf-e-naz hai hudhud ke shane mein

kuja ma'zuli-e-aina ko tark-e-KHud-arai

namad dar-ab hai ai sada purkar is bahane mein

ba-hukm-e-'ijz abru-e-mah-e-nau hairat-ima hai

ki yan gum kar jabin-e-sajda-farsa aastane mein