qibla-e-dil kaba-e-jaan aur hai

qibla-e-dil kāba-e-jāñ aur hai

sajda-gāh-e-ahl-e-irfāñ aur hai

ho ke ḳhush kaTvāte haiñ apne gale

āshiqoñ kī īd-e-qurbāñ aur hai

roz-o-shab yaañ ek sī hai raushnī

dil ke dāġhoñ kā charāġhāñ aur hai

ḳhaal dikhlātī hai phūloñ kī bahār

bulbulo apnā gulistāñ aur hai

qaid meñ ārām āzādī vabāl

ham giraftāroñ kā zindāñ aur hai

bahr-e-ulfat meñ nahīñ kashtī kā kaam

nuuh se kah do ye tūfāñ aur hai

kis ko andesha hai barq o sail se

apnā ḳhirman kā nigahbāñ aur hai

dard vo dil meñ vo siine par hai daaġh

jis kā marham jis kā darmāñ aur hai

ka.aba-rū mehrāb-e-abrū ai 'amīr'

apnī taa.at apnā īmāñ aur hai

qibla-e-dil kaba-e-jaan aur hai

sajda-gah-e-ahl-e-irfan aur hai

ho ke KHush kaTwate hain apne gale

aashiqon ki id-e-qurban aur hai

roz-o-shab yan ek si hai raushni

dil ke daghon ka charaghan aur hai

KHal dikhlati hai phulon ki bahaar

bulbulo apna gulistan aur hai

qaid mein aaram aazadi wabaal

hum giraftaron ka zindan aur hai

bahr-e-ulfat mein nahin kashti ka kaam

nuh se kah do ye tufan aur hai

kis ko andesha hai barq o sail se

apna KHirman ka nigahban aur hai

dard wo dil mein wo sine par hai dagh

jis ka marham jis ka darman aur hai

kaba-ru mehrab-e-abru ai 'amir'

apni taat apna iman aur hai