qillat KHulus ki hai mohabbat ka kal hai

qillat ḳhulūs kī hai mohabbat kā kaal hai

is shahr-e-nā-sipās meñ jiinā muhāl hai

peḌoñ pe chāñdnī ke hayūle haiñ mahv-e-raqs

kamre meñ tīrgī kī lakīroñ kā jaal hai

sāñsoñ kā rabt jaise musalsal azaab ho

vo shaḳhs kyā jiye jise terā ḳhayāl hai

lamhoñ ne chhīn lī hai rutoñ se shaguftagī

ye saal mausamoñ ke taġhayyur kā saal hai

ab to shikast-e-jāñ ke amal se najāt de

ye nā-tavāñ vajūd dukhoñ se niDhāl hai

chiḌiyāñ chahak chahak ke pareshān ho ga.iiñ

kavvoñ kā shor ghar kī fazā kā vabāl hai

phūloñ kā lams chāñd kī ThanDak bhī hech hai

vo ḳhush badan to aap hī apnī misāl hai

aa phir se mere pyaar kī taqdīs ban 'niyāz'

aa kāñpte laboñ pe tirā hī savāl hai

qillat KHulus ki hai mohabbat ka kal hai

is shahr-e-na-sipas mein jina muhaal hai

peDon pe chandni ke hayule hain mahw-e-raqs

kamre mein tirgi ki lakiron ka jal hai

sanson ka rabt jaise musalsal azab ho

wo shaKHs kya jiye jise tera KHayal hai

lamhon ne chhin li hai ruton se shaguftagi

ye sal mausamon ke taghayyur ka sal hai

ab to shikast-e-jaan ke amal se najat de

ye na-tawan wajud dukhon se niDhaal hai

chiDiyan chahak chahak ke pareshan ho gain

kawwon ka shor ghar ki faza ka wabaal hai

phulon ka lams chand ki ThanDak bhi hech hai

wo KHush badan to aap hi apni misal hai

aa phir se mere pyar ki taqdis ban 'niyaz'

aa kanpte labon pe tera hi sawal hai