qindil-e-mah-o-mehr ka aflak pe hona

qindīl-e-mah-o-mehr kā aflāk pe honā

kuchh is se ziyāda hai mirā ḳhaak pe honā

har sub.h nikalnā kisī dīvār-e-tarab se

har shaam kisī manzil-e-ġhamnāk pe honā

yā ek sitāre kā guzarnā kisī dar se

yā ek piyāle kā kisī chaak pe honā

lau detī hai tasvīr nihāñ-ḳhāna-e-dil meñ

lāzim nahīñ is phuul kā poshāk pe honā

le aa.egā ik roz gul o barg bhī 'sarvat'

bārāñ kā musalsal ḳhas-o-ḳhāshāk pe honā

qindil-e-mah-o-mehr ka aflak pe hona

kuchh is se ziyaada hai mera KHak pe hona

har subh nikalna kisi diwar-e-tarab se

har sham kisi manzil-e-ghamnak pe hona

ya ek sitare ka guzarna kisi dar se

ya ek piyale ka kisi chaak pe hona

lau deti hai taswir nihan-KHana-e-dil mein

lazim nahin is phul ka poshak pe hona

le aaega ek roz gul o barg bhi 'sarwat'

baran ka musalsal KHas-o-KHashak pe hona