qismat mein agar judaiyan hain

qismat meñ agar judā.iyāñ haiñ

phir kyuuñ tirī yādeñ ā.iyāñ haiñ

yaañ jiine kī sūrateñ haiñ jitnī

vo sūrateñ sab parā.iyāñ haiñ

fariyād-kunāñ nahīñ bas ik maiñ

chāroñ hī taraf duhā.iyāñ haiñ

har darje pe ishq kar ke dekhā

har darje meñ bevafā.iyāñ haiñ

ik terā burā kabhī na chāhā

go ham meñ bahut burā.iyāñ haiñ

taqrīb-e-visāl-e-yār hai kyā

kūche meñ tire safā.iyāñ haiñ

us ne bhī kasar koī koī chhoḌī

ham ne bhī bahut sunā.iyāñ haiñ

ab aur kahīñ kā ruḳh kareñ aap

is jag meñ to jag-hañsā.iyāñ haiñ

kaise kareñ bandagī 'zafar' vaañ

bandoñ kī jahāñ ḳhudā.iyāñ haiñ

qismat mein agar judaiyan hain

phir kyun teri yaaden aaiyan hain

yan jine ki suraten hain jitni

wo suraten sab paraiyan hain

fariyaad-kunan nahin bas ek main

chaaron hi taraf duhaiyan hain

har darje pe ishq kar ke dekha

har darje mein bewafaiyan hain

ek tera bura kabhi na chaha

go hum mein bahut buraiyan hain

taqrib-e-visal-e-yar hai kya

kuche mein tere safaiyan hain

us ne bhi kasar koi koi chhoDi

hum ne bhi bahut sunaiyan hain

ab aur kahin ka ruKH karen aap

is jag mein to jag-hansaiyan hain

kaise karen bandagi 'zafar' wan

bandon ki jahan KHudaiyan hain