qufl-e-sad-KHana-e-dil aaya jo tu TuT gae

qufl-e-sad-ḳhāna-e-dil aayā jo tū TuuT ga.e

jo tilismāt na TuuTe the kabhū TuuT ga.e

saikḌoñ kaasa sar-e-dahr meñ mānind-e-habāb

kabhū ai charḳh bane tujh se kabhū TuuT ga.e

Tāñke kyā jaib ke phir bād-e-rafū TuuT ga.e

ho ke nāḳhun kabhī siine meñ faro TuuT ga.e

tū jo kahtā hai ki de ġhair ko bhī sāġhar-e-mai

haath kyā us ke haiñ ai ā.īna-rū TuuT ga.e

kyūñke bin kashtī-e-mai kījiye sair-e-dariyā

mai-kasho zer-e-baġhal ab to kadū TuuT ga.e

dekh kar surme kī tahrīr tirī āñkhoñ meñ

kāfiroñ ke bhī haiñ zunnār gulū TuuT ga.e

sadma-e-ġham se tire juuñ gul-bāzī afsos

saare a.azā mire ai arbada-jū TuuT ga.e

sañg-e-ġhairat se ka.ī ā.īne ai ahd shikan

dekh kar saaf tirā rū-e-nakū TuuT ga.e

tiir dil se vo nikalte haiñ koī jazba-e-shauq

nikle sūfār jo siine se gulū TuuT ga.e

dil shikasta hī rahā ba.ad-e-fanā bhī maiñ to

ki mirī ḳhaak se bante hī subū TuuT ga.e

shiddat-e-girya se thā raat ye ashkoñ kā hujūm

chashm-e-tar phir mire mizhgāñ ke haiñ mū TuuT ga.e

gulshan-e-ishq meñ allāh hai kyā kasrat-e-bār

bin havā kitne hī naḳhl-e-lab-e-jū TuuT ga.e

kah ba-tabdīl-e-qavāfī ġhazal ik aur bhī 'zauq'

dekheñ biThlā.e hai kis tarah se tū TuuT ga.e

qufl-e-sad-KHana-e-dil aaya jo tu TuT gae

jo tilismat na TuTe the kabhu TuT gae

saikDon kasa sar-e-dahr mein manind-e-habab

kabhu ai charKH bane tujh se kabhu TuT gae

Tanke kya jaib ke phir baad-e-rafu TuT gae

ho ke naKHun kabhi sine mein faro TuT gae

tu jo kahta hai ki de ghair ko bhi saghar-e-mai

hath kya us ke hain ai aaina-ru TuT gae

kyunke bin kashti-e-mai kijiye sair-e-dariya

mai-kasho zer-e-baghal ab to kadu TuT gae

dekh kar surme ki tahrir teri aankhon mein

kafiron ke bhi hain zunnar gulu TuT gae

sadma-e-gham se tere jun gul-bazi afsos

sare aaza mere ai arbada-ju TuT gae

sang-e-ghairat se kai aaine ai ahd shikan

dekh kar saf tera ru-e-naku TuT gae

tir dil se wo nikalte hain koi jazba-e-shauq

nikle sufar jo sine se gulu TuT gae

dil shikasta hi raha baad-e-fana bhi main to

ki meri KHak se bante hi subu TuT gae

shiddat-e-girya se tha raat ye ashkon ka hujum

chashm-e-tar phir mere mizhgan ke hain mu TuT gae

gulshan-e-ishq mein allah hai kya kasrat-e-bar

bin hawa kitne hi naKHl-e-lab-e-ju TuT gae

kah ba-tabdil-e-qawafi ghazal ek aur bhi 'zauq'

dekhen biThlae hai kis tarah se tu TuT gae