quran kitab hai ruKH-e-jaanan ke samne

qur.āñ kitāb hai ruḳh-e-jānāñ ke sāmne

mus.haf uThā luuñ sāhib-e-qur.āñ ke sāmne

jannat hai gard kūcha-e-jānāñ ke sāmne

dozaḳh hai sard sīna-e-sozāñ ke sāmne

sakta abhī ho rūh-e-sikandar ko sharm se

ā.īna aa.e gar tire hairāñ ke sāmne

bahr-e-umīd gar use phailā.ūñ sū-e-yār

dāmān-e-dasht tang ho dāmāñ ke sāmne

dast-e-junūñ se vo bhī na vahshat meñ bach sakā

parda jo kuchh rahā thā garebāñ ke sāmne

mashshāta ho azīz-e-zuleḳhā agar vo laa.e

is mehr-e-misr ko mah-e-kan.āñ ke sāmne

nādān kah rahe haiñ jise āftāb-e-hashr

zarra hai us ke rū-e-daraḳhshāñ ke sāmne

dam band us latoḌe kī jur.at ne kar diyā

kartā hai rez bulbul-e-bustāñ ke sāmne

dīvār surḳh ḳhuun se dekhī patā milā

qāsid Thahar gayā dar-e-jānāñ ke sāmne

kahte haiñ roz-e-vasl jise past-hausla

be-qadr hai mirī shab-e-hijrāñ ke sāmne

taqrīr dil jalātī hai sunñe se ai 'surūr'

aatā hai kaun mujh sharar-afshāñ ke sāmne

quran kitab hai ruKH-e-jaanan ke samne

mushaf uTha lun sahib-e-quran ke samne

jannat hai gard kucha-e-jaanan ke samne

dozaKH hai sard sina-e-sozan ke samne

sakta abhi ho ruh-e-sikandar ko sharm se

aaina aae gar tere hairan ke samne

bahr-e-umid gar use phailaun su-e-yar

daman-e-dasht tang ho daman ke samne

dast-e-junun se wo bhi na wahshat mein bach saka

parda jo kuchh raha tha gareban ke samne

mashshata ho aziz-e-zuleKHa agar wo lae

is mehr-e-misr ko mah-e-kanan ke samne

nadan kah rahe hain jise aaftab-e-hashr

zarra hai us ke ru-e-daraKHshan ke samne

dam band us latoDe ki jurat ne kar diya

karta hai rez bulbul-e-bustan ke samne

diwar surKH KHun se dekhi pata mila

qasid Thahar gaya dar-e-jaanan ke samne

kahte hain roz-e-wasl jise past-hausla

be-qadr hai meri shab-e-hijran ke samne

taqrir dil jalati hai sunne se ai 'surur'

aata hai kaun mujh sharar-afshan ke samne