qurban jaun husn-e-qamar intisab ke

qurbān jā.ūñ husn-e-qamar intisāb ke

aariz haiñ yā haiñ phuul shagufta gulāb ke

ab din kahāñ rahe vo hamāre sabāt ke

ik dhuup thī jo saath ga.ī āftāb ke

har ik adā meñ us kī hai qaus-e-quzah kā rañg

hai guftugū meñ kitne havāle kitāb ke

hālāt ne jhiñjhoḌ ke hoshiyār to kiyā

jaage hue haiñ phir bhī to āsār ḳhvāb ke

phailā chuke haiñ firqa-parastī kā zahr vo

aa.e haiñ sāmne jo adad intiḳhāb ke

golī se hal na hoñge mohabbat se hoñge hal

qaziye hoñ kāshmīr ke yā pañj-āb ke

niklī saroñ kī fasl hai gobhī ke khet se

khilte jahāñ ye phuul the kal tak gulāb ke

pīr-e-muġhāñ se 'faḳhr' yahī ik savāl hai

auñdhe haiñ aaj jām-o-subū kyuuñ sharāb ke

qurban jaun husn-e-qamar intisab ke

aariz hain ya hain phul shagufta gulab ke

ab din kahan rahe wo hamare sabaat ke

ek dhup thi jo sath gai aaftab ke

har ek ada mein us ki hai qaus-e-quzah ka rang

hai guftugu mein kitne hawale kitab ke

haalat ne jhinjhoD ke hoshiyar to kiya

jage hue hain phir bhi to aasar KHwab ke

phaila chuke hain firqa-parasti ka zahr wo

aae hain samne jo adad intiKHab ke

goli se hal na honge mohabbat se honge hal

qaziye hon kashmir ke ya panj-ab ke

nikli saron ki fasl hai gobhi ke khet se

khilte jahan ye phul the kal tak gulab ke

pir-e-mughan se 'faKHr' yahi ek sawal hai

aundhe hain aaj jam-o-subu kyun sharab ke