قربت حسن میں بھی درد کے آثار ملے

قربت حسن میں بھی درد کے آثار ملے

چارہ گر عشق کے مرہم کے طلب گار ملے

دست و پا اپنے تو وابستۂ زنجیر سہی

اک تمنا تھی کوئی صاحب و مختار ملے

ہاں جنوں خیزیٔ دل رہن مسرت نہ ہوئی

خوش ہوئی وحشت غم جب رسن و دار ملے

خاک اڑائیں کہ نئے شہر بسائیں یارو

ہم بہ ہر رنگ ہر اک شوق سے بیزار ملے

ہم ہیں اس کار گہ شیشہ گراں میں حیراں

آئنہ تاب نظارہ کے طلب گار ملے

شوق بے منت احسان دگر کیا کہئے

خود سے اس شوق میں ہم بر سر پیکار ملے

دشت مجنوں تھا کوئی تیشہ فرہاد کوئی

عشرت مرگ سہی حیلۂ بے کار ملے

خواہش مرگ در یار تمنا ہی سہی

سر مگر دوش پہ ہم کو بھی گراں بار ملے

شب قیامت سی گزر جاتی ہے تنہائی میں

بخت یاور ہے جسے دیدۂ بے دار ملے

اپنے ہم سایے میں وہ ہے جسے دیکھا بھی نہیں

ایسے ہم سایے کہ دیوار سے دیوار ملے