qurbaten hote hue bhi faslon mein qaid hain

qurbateñ hote hue bhī fāsloñ meñ qaid haiñ

kitnī āzādī se ham apnī hadoñ meñ qaid haiñ

kaun sī āñkhoñ meñ mere ḳhvāb raushan haiñ abhī

kis kī nīñdeñ haiñ jo mere ratjagoñ meñ qaid haiñ

shahr ābādī se ḳhālī ho ga.e ḳhushbū se phuul

aur kitnī ḳhvāhisheñ haiñ jo diloñ meñ qaid haiñ

paañv meñ rishtoñ kī zanjīreñ haiñ dil meñ ḳhauf kī

aisā lagtā hai ki ham apne gharoñ meñ qaid haiñ

ye zamīñ yūñhī sikuḌtī jā.egī aur ek din

phail jā.eñge jo tūfāñ sāhiloñ meñ qaid haiñ

is jazīre par azal se ḳhaak uḌtī hai havā

manziloñ ke bhed phir bhī rāstoñ meñ qaid haiñ

kaun ye pātāl se ubhrā kināre par 'salīm'

sar-phirī maujeñ abhī tak dā.eroñ meñ qaid haiñ

qurbaten hote hue bhi faslon mein qaid hain

kitni aazadi se hum apni hadon mein qaid hain

kaun si aankhon mein mere KHwab raushan hain abhi

kis ki ninden hain jo mere ratjagon mein qaid hain

shahr aabaadi se KHali ho gae KHushbu se phul

aur kitni KHwahishen hain jo dilon mein qaid hain

panw mein rishton ki zanjiren hain dil mein KHauf ki

aisa lagta hai ki hum apne gharon mein qaid hain

ye zamin yunhi sikuDti jaegi aur ek din

phail jaenge jo tufan sahilon mein qaid hain

is jazire par azal se KHak uDti hai hawa

manzilon ke bhed phir bhi raston mein qaid hain

kaun ye patal se ubhra kinare par 'salim'

sar-phiri maujen abhi tak daeron mein qaid hain