qurbaten nahin rakkhin fasla nahin rakkha

qurbateñ nahīñ rakkhīñ fāsla nahīñ rakkhā

ek baar bichhḌe to rābta nahīñ rakkhā

itnā to samajhte the ham bhī us kī majbūrī

intizār thā lekin dar khulā nahīñ rakkhā

ham ko apne baare meñ ḳhush-gumāniyāñ kyuuñ hoñ

ham ne rū-ba-rū apne ā.īna nahīñ rakkhā

jab pata chalā is meñ sirf ḳhuun jaltā hai

us ke ba.ad sochoñ kā silsila nahīñ rakkhā

har dafa vahī chehre bārhā vahī bāteñ

in purānī yādoñ meñ kuchh nayā nahīñ rakhā

apne apne raste par sab nikal ga.e ik din

saath chalne vāloñ ne hausla nahīñ rakkhā

jab havā ke ruḳh par hī kashtiyoñ ko bahnā thā

tum ne bādbānoñ ko kyuuñ khulā nahīñ rakkhā

ham ko apne baare meñ harf harf likhnā thā

dāstān lambī thī hāshiya nahīñ rakkhā

qurbaten nahin rakkhin fasla nahin rakkha

ek bar bichhDe to rabta nahin rakkha

itna to samajhte the hum bhi us ki majburi

intizar tha lekin dar khula nahin rakkha

hum ko apne bare mein KHush-gumaniyan kyun hon

hum ne ru-ba-ru apne aaina nahin rakkha

jab pata chala is mein sirf KHun jalta hai

us ke baad sochon ka silsila nahin rakkha

har dafa wahi chehre barha wahi baaten

in purani yaadon mein kuchh naya nahin rakha

apne apne raste par sab nikal gae ek din

sath chalne walon ne hausla nahin rakkha

jab hawa ke ruKH par hi kashtiyon ko bahna tha

tum ne baadbanon ko kyun khula nahin rakkha

hum ko apne bare mein harf harf likhna tha

dastan lambi thi hashiya nahin rakkha