raegan jati na kyun phir hama-koshi uski

rā.egāñ jaatī na kyuuñ phir hama-koshī us kī

thī ġharaz-kār bahut halqa-ba-goshī us kī

har taraf us ne diyā jism-numā.ī ko rivāj

ḳhuub mash.hūr huī sāya-faroshī us kī

bar-sar-e-ām mirī chup kī jo tash.hīr huī

mushta.il ho uThī āvāz-bagoshī us kī

mun.akis ho na sakī koī bhī sūrat us se

ya.anī be-kār ga.ī ā.ina-poshī us kī

aa gayā vo mirī ḳhurshed-panāhī ke tale

mujh se dekhī na ga.ī ḳhāna-badoshī us kī

be-farishta huā kab shāna ḳhabar tak na huī

mujh pe taarī thī kuchh is tarah be-hoshī us kī

ḳhaas kar lījiye 'parvez' kā saanī koī

aam hone ko hai dil-doz ḳhamoshī us kī

raegan jati na kyun phir hama-koshi us ki

thi gharaz-kar bahut halqa-ba-goshi us ki

har taraf us ne diya jism-numai ko riwaj

KHub mashhur hui saya-faroshi us ki

bar-sar-e-am meri chup ki jo tashhir hui

mushtail ho uThi aawaz-bagoshi us ki

munakis ho na saki koi bhi surat us se

yani be-kar gai aaina-poshi us ki

aa gaya wo meri KHurshed-panahi ke tale

mujh se dekhi na gai KHana-badoshi us ki

be-farishta hua kab shana KHabar tak na hui

mujh pe tari thi kuchh is tarah be-hoshi us ki

KHas kar lijiye 'parwez' ka sani koi

aam hone ko hai dil-doz KHamoshi us ki