rah-e-talab mein aaj ye kya moajaza hua

rāh-e-talab meñ aaj ye kyā mo.ajaza huā

ḳhvāb-e-adam meñ jo bhī gayā jāgtā huā

maidāñ meñ haar jiit kā yuuñ faisla huā

duniyā thī un ke saath hamārā ḳhudā huā

barsoñ kī dostī kā chalan kyā se kyā huā

kis muñh se ham mileñge agar sāmnā huā

sadiyoñ kā dard vaqt kī āvāz ban gayā

phir se bapā vo ma.arka-e-karbalā huā

laayā hai rañg ḳhūn-e-shahīdāñ ba-faiz-e-shauq

nazroñ ke sāmne hai gulistāñ khilā huā

patthar bane hue the zabāñ de gayā hameñ

ehsās kī ragoñ meñ lahū boltā huā

rāheñ simaT simaT ke nigāhoñ meñ aa ga.iiñ

jo bhī qadam uThā vahī manzil-numā huā

āñkhoñ meñ mish.aleñ haiñ firozāñ davām kī

dil meñ hai terī yaad kā kāñTā chubhā huā

tū manzil-e-hayāt se aage nikal gayā

maiñ aa rahā huuñ terā pata pūchhtā huā

jaañ nazr kī to donoñ jahāñ mil ga.e hameñ

tai marg o zindagī kā har ik marhala huā

yuuñ dil meñ aaj nuur kī bārish huī 'jamīl'

jaise koī charāġh jalā de bujhā huā

rah-e-talab mein aaj ye kya moajaza hua

KHwab-e-adam mein jo bhi gaya jagta hua

maidan mein haar jit ka yun faisla hua

duniya thi un ke sath hamara KHuda hua

barson ki dosti ka chalan kya se kya hua

kis munh se hum milenge agar samna hua

sadiyon ka dard waqt ki aawaz ban gaya

phir se bapa wo marka-e-karbala hua

laya hai rang KHun-e-shahidan ba-faiz-e-shauq

nazron ke samne hai gulistan khila hua

patthar bane hue the zaban de gaya hamein

ehsas ki ragon mein lahu bolta hua

rahen simaT simaT ke nigahon mein aa gain

jo bhi qadam uTha wahi manzil-numa hua

aankhon mein mishalen hain firozan dawam ki

dil mein hai teri yaad ka kanTa chubha hua

tu manzil-e-hayat se aage nikal gaya

main aa raha hun tera pata puchhta hua

jaan nazr ki to donon jahan mil gae hamein

tai marg o zindagi ka har ek marhala hua

yun dil mein aaj nur ki barish hui 'jamil'

jaise koi charagh jala de bujha hua