rah-e-talab mein kaun kisi ka apne bhi begane hain

rāh-e-talab meñ kaun kisī kā apne bhī begāne haiñ

chāñd se mukhḌe rashk-e-ġhazālāñ sab jaane pahchāne haiñ

tanhā.ī sī tanhā.ī hai kaise kaheñ kaise samjhā.eñ

chashm o lab-o-ruḳhsār kī tah meñ rūhoñ ke vīrāne haiñ

uf ye talāsh-e-husn-o-haqīqat kis jā Thahreñ jaa.eñ kahāñ

sehn-e-chaman meñ phuul khile haiñ sahrā meñ dīvāne haiñ

ham ko sahāre kyā raas aa.eñ apnā sahārā haiñ ham aap

ḳhud hī sahrā ḳhud hī divāne sham-e-nafas parvāne haiñ

bil-āḳhir thak haar ke yaaro ham ne bhī taslīm kiyā

apnī zaat se ishq hai sachchā baaqī sab afsāne haiñ

rah-e-talab mein kaun kisi ka apne bhi begane hain

chand se mukhDe rashk-e-ghazalan sab jaane pahchane hain

tanhai si tanhai hai kaise kahen kaise samjhaen

chashm o lab-o-ruKHsar ki tah mein ruhon ke virane hain

uf ye talash-e-husn-o-haqiqat kis ja Thahren jaen kahan

sehn-e-chaman mein phul khile hain sahra mein diwane hain

hum ko sahaare kya ras aaen apna sahaara hain hum aap

KHud hi sahra KHud hi diwane sham-e-nafas parwane hain

bil-aKHir thak haar ke yaro hum ne bhi taslim kiya

apni zat se ishq hai sachcha baqi sab afsane hain