rah ki kuchh to rukawaT yar kam kar dijiye

raah kī kuchh to rukāvaT yaar kam kar dījiye

aap apne ghar kī ik dīvār kam kar dījiye

aap kā āshiq bahut kamzor dil kā hai huzūr

dekhiye ye shiddat-e-inkār kam kar dījiye

maiñ bhī hoñToñ se kahūñgā kam kareñ jalne kā shauq

aap agar sargarmī-e-ruḳhsār kam kar dījiye

ek to sharm aap kī aur us pe takiya darmiyāñ

donoñ dīvāroñ meñ ik dīvār kam kar dījiye

aap to bas kholiye lab bosa dene ke liye

bosa dene par jo hai takrār kam kar dījiye

raat ke pahlū meñ phailā dījiye zulf-e-darāz

yūñhī kuchh tūl-e-sab-e-bīmār kam kar dījiye

yā idhar kuchh tez kar diije gharoñ kī raushnī

yā udhar kuchh raunaq-e-bāzār kam kar dījiye

vo jo pīchhe rah ga.e haiñ tez-raftārī kareñ

aap aage haiñ to kuchh raftār kam kar dījiye

haath meñ hai aap ke talvār kiije qatl-e-ām

haañ magar talvār kī kuchh dhaar kam kar dījiye

bas mohabbat bas mohabbat bas mohabbat jān-e-man

baaqī sab jazbāt kā iz.hār kam kar dījiye

shā.irī tanhā.ī kī raunaq hai mahfil kī nahīñ

'farhat-ehsās' apnā ye darbār kam kar dījiye

rah ki kuchh to rukawaT yar kam kar dijiye

aap apne ghar ki ek diwar kam kar dijiye

aap ka aashiq bahut kamzor dil ka hai huzur

dekhiye ye shiddat-e-inkar kam kar dijiye

main bhi honTon se kahunga kam karen jalne ka shauq

aap agar sargarmi-e-ruKHsar kam kar dijiye

ek to sharm aap ki aur us pe takiya darmiyan

donon diwaron mein ek diwar kam kar dijiye

aap to bas kholiye lab bosa dene ke liye

bosa dene par jo hai takrar kam kar dijiye

raat ke pahlu mein phaila dijiye zulf-e-daraaz

yunhi kuchh tul-e-sab-e-bimar kam kar dijiye

ya idhar kuchh tez kar dije gharon ki raushni

ya udhar kuchh raunaq-e-bazar kam kar dijiye

wo jo pichhe rah gae hain tez-raftari karen

aap aage hain to kuchh raftar kam kar dijiye

hath mein hai aap ke talwar kije qatl-e-am

han magar talwar ki kuchh dhaar kam kar dijiye

bas mohabbat bas mohabbat bas mohabbat jaan-e-man

baqi sab jazbaat ka izhaar kam kar dijiye

shairi tanhai ki raunaq hai mahfil ki nahin

'farhat-ehsas' apna ye darbar kam kar dijiye