rah manzil ki musafir ko sujhate hain charagh

raah manzil kī musāfir ko sujhāte haiñ charāġh

raushnī kar ke añdheroñ ko miTāte haiñ charāġh

jin kī āñkheñ nahīñ un ke liye be-faiz magar

aañkh vāloñ ke bahut kaam banāte haiñ charāġh

din nikaltā hai to ho jaate haiñ ye be-vaq.at

zulmat-e-shab meñ magar rañg jamāte haiñ charāġh

yaad kartā huuñ maiñ us rashk-e-qamar ko aise

jis tarah log añdhere meñ jalāte haiñ charāġh

Dar ke tārīkī se jo tark-e-safar kartā hai

hausla aise musāfir kā baḌhāte haiñ charāġh

chain se baiThnā logoñ ko kahāñ aatā hai

ḳhud nahīñ rakhte to auroñ ke bujhāte haiñ charāġh

dars dete haiñ mohabbat kā 'zamāñ' ko aksar

log nādān haiñ sūraj ko dikhāte haiñ charāġh

rah manzil ki musafir ko sujhate hain charagh

raushni kar ke andheron ko miTate hain charagh

jin ki aankhen nahin un ke liye be-faiz magar

aankh walon ke bahut kaam banate hain charagh

din nikalta hai to ho jate hain ye be-waqat

zulmat-e-shab mein magar rang jamate hain charagh

yaad karta hun main us rashk-e-qamar ko aise

jis tarah log andhere mein jalate hain charagh

Dar ke tariki se jo tark-e-safar karta hai

hausla aise musafir ka baDhate hain charagh

chain se baiThna logon ko kahan aata hai

KHud nahin rakhte to auron ke bujhate hain charagh

dars dete hain mohabbat ka 'zaman' ko aksar

log nadan hain suraj ko dikhate hain charagh