rah mein uski chalen aur imtihan koi na ho

raah meñ us kī chaleñ aur imtihāñ koī na ho

kaise mumkin hai ki ātish ho dhuāñ koī na ho

us kī marzī hai vo mil jaa.e kisī ko bhiiḌ meñ

aur kabhī aise mile ki darmiyāñ koī na ho

jagmagātā hai sitāra ban ke tab ummīd kā

bujh ga.e hoñ sab diye aur kahkashāñ koī na ho

ḳhāna-e-dil meñ vo rahtā kab kisī ke saath hai

jalvagar hotā hai vo jab mehmāñ koī na ho

kaise mumkin hai ki qisse jis se sab vābasta hoñ

vo chale aur saath us ke dāstāñ koī na ho

saare aalam par vo likh detā hai us kā naam jab

koī ḳhud ko yuuñ miTā le ki nishāñ koī na ho

ban ke lashkar saath ho jaatā hai vo 'fayyāz' jab

ham-safar koī na ho aur kārvāñ koī na ho

rah mein us ki chalen aur imtihan koi na ho

kaise mumkin hai ki aatish ho dhuan koi na ho

us ki marzi hai wo mil jae kisi ko bhiD mein

aur kabhi aise mile ki darmiyan koi na ho

jagmagata hai sitara ban ke tab ummid ka

bujh gae hon sab diye aur kahkashan koi na ho

KHana-e-dil mein wo rahta kab kisi ke sath hai

jalwagar hota hai wo jab mehman koi na ho

kaise mumkin hai ki qisse jis se sab wabasta hon

wo chale aur sath us ke dastan koi na ho

sare aalam par wo likh deta hai us ka nam jab

koi KHud ko yun miTa le ki nishan koi na ho

ban ke lashkar sath ho jata hai wo 'fayyaz' jab

ham-safar koi na ho aur karwan koi na ho