rah par un ko laga lae to hain baaton mein

raah par un ko lagā laa.e to haiñ bātoñ meñ

aur khul jā.eñge do chaar mulāqātoñ meñ

ye bhī tum jānte ho chand mulāqātoñ meñ

āzmāyā hai tumheñ ham ne ka.ī bātoñ meñ

ġhair ke sar kī balā.eñ jo nahīñ leñ zālim

kyā mire qatl ko bhī jaan nahīñ hāthoñ meñ

abr-e-rahmat hī barastā nazar aayā zāhid

ḳhaak uḌtī kabhī dekhī na ḳharābātoñ meñ

yārab us chāñd ke TukḌe ko kahāñ se lā.ūñ

raushnī jis kī ho in tāroñ bharī rātoñ meñ

tumhīñ insāf se ai hazrat nāseh kah do

lutf un bātoñ meñ aatā hai ki in bātoñ meñ

dauḌ kar dast-e-duā saath duā ke jaate

haa.e paidā na hue paañv mire hāthoñ meñ

jalva-e-yār se jab bazm meñ ġhash aayā hai

to raqīboñ ne sambhālā hai mujhe hāthoñ meñ

aisī taqrīr sunī thī na kabhī shoḳh-o-sharīr

terī āñkhoñ ke bhī fitne haiñ tirī bātoñ meñ

ham se inkār huā ġhair se iqrār huā

faisla ḳhuub kiyā aap ne do bātoñ meñ

haft aflāk haiñ lekin nahīñ khultā ye hijāb

kaun sā dushman-e-ushshāq haiñ in sātoñ meñ

aur sunte abhī rindoñ se janāb-e-vā.iz

chal diye aap to do-chār salāvātoñ meñ

ham ne dekhā unhīñ logoñ ko tirā dam bharte

jin kī shohrat thī ye hargiz nahīñ in bātoñ meñ

bheje detā hai unheñ ishq matā-e-dil-o-jāñ

ek sarkār luTī jaatī hai sauġhātoñ meñ

dil kuchh āgāh to ho sheva-e-ayyārī se

is liye aap ham aate haiñ tirī ghātoñ meñ

vasl kaisā vo kisī tarah bahalte hī na the

shaam se sub.h huī un kī mudārātoñ meñ

vo ga.e din jo rahe yaad butoñ kī ai 'dāġh'

raat bhar ab to guzartī hai munājātoñ meñ

rah par un ko laga lae to hain baaton mein

aur khul jaenge do chaar mulaqaton mein

ye bhi tum jaante ho chand mulaqaton mein

aazmaya hai tumhein hum ne kai baaton mein

ghair ke sar ki balaen jo nahin len zalim

kya mere qatl ko bhi jaan nahin hathon mein

abr-e-rahmat hi barasta nazar aaya zahid

KHak uDti kabhi dekhi na KHarabaaton mein

yarab us chand ke TukDe ko kahan se laun

raushni jis ki ho in taron bhari raaton mein

tumhin insaf se ai hazrat naseh kah do

lutf un baaton mein aata hai ki in baaton mein

dauD kar dast-e-dua sath dua ke jate

hae paida na hue panw mere hathon mein

jalwa-e-yar se jab bazm mein ghash aaya hai

to raqibon ne sambhaala hai mujhe hathon mein

aisi taqrir suni thi na kabhi shoKH-o-sharir

teri aankhon ke bhi fitne hain teri baaton mein

hum se inkar hua ghair se iqrar hua

faisla KHub kiya aap ne do baaton mein

haft aflak hain lekin nahin khulta ye hijab

kaun sa dushman-e-ushshaq hain in saton mein

aur sunte abhi rindon se janab-e-waiz

chal diye aap to do-chaar salawaton mein

hum ne dekha unhin logon ko tera dam bharte

jin ki shohrat thi ye hargiz nahin in baaton mein

bheje deta hai unhen ishq mata-e-dil-o-jaan

ek sarkar luTi jati hai saughaton mein

dil kuchh aagah to ho shewa-e-ayyari se

is liye aap hum aate hain teri ghaton mein

wasl kaisa wo kisi tarah bahalte hi na the

sham se subh hui un ki mudaraaton mein

wo gae din jo rahe yaad buton ki ai 'dagh'

raat bhar ab to guzarti hai munajaton mein