rahat-e-wasl bina hijr ki shiddat ke baghair

rāhat-e-vasl binā hijr kī shiddat ke baġhair

zindagī kaise basar hogī mohabbat ke baġhair

ab ke ye soch ke bīmār paḌe haiñ ki hameñ

Thiik honā hī nahīñ terī ayādat ke baġhair

ishq ke māroñ ko ādāb kahāñ aate haiñ

tere kūche meñ chale aa.e ijāzat ke baġhair

ham se pūchho to ki ham kaise haiñ ai ham-vatano

apne yāroñ ke binā apnī mohabbat ke baġhair

mulk to mulk gharoñ par bhī hai qabza us kā

ab to ghar bhī nahīñ chalte haiñ siyāsat ke baġhair

aks kis kā ye utar aayā hai ā.īne meñ

kaun ye dekh rahā hai mujhe hairat ke baġhair

hāsil-e-ishq agar kuchh hai to vahshat hai 'ziyā'

aur insān mukammal nahīñ vahshat ke baġhair

rahat-e-wasl bina hijr ki shiddat ke baghair

zindagi kaise basar hogi mohabbat ke baghair

ab ke ye soch ke bimar paDe hain ki hamein

Thik hona hi nahin teri ayaadat ke baghair

ishq ke maron ko aadab kahan aate hain

tere kuche mein chale aae ijazat ke baghair

hum se puchho to ki hum kaise hain ai ham-watano

apne yaron ke bina apni mohabbat ke baghair

mulk to mulk gharon par bhi hai qabza us ka

ab to ghar bhi nahin chalte hain siyasat ke baghair

aks kis ka ye utar aaya hai aaine mein

kaun ye dekh raha hai mujhe hairat ke baghair

hasil-e-ishq agar kuchh hai to wahshat hai 'ziya'

aur insan mukammal nahin wahshat ke baghair