rahbar so gae ham-safar so gae

rāhbar so ga.e ham-safar so ga.e

kaun jāgegā ham bhī agar so ga.e

gesū-e-vaqt ab kaun suljhā.egā

be-ḳhabar jaag uThe bā-ḳhabar so ga.e

is haqīqat se inkār mumkin nahīñ

so ga.ī qaum jab dīda-var so ga.e

miT gayā dil se kyā ḳhauf-e-dār-o-rasan

log phūloñ pe kyā soch kar so ga.e

apnī barbādiyāñ apne hāthoñ huiiñ

jāgnā thā hameñ ham magar so ga.e

be-gharoñ ko takalluf se kyā vāsta

niiñd aa.ī sar-e-rahguzar so ga.e

vo ga.e ghar kī rā'nā.iyāñ bhī ga.iiñ

yuuñ lagā jaise dīvār-o-dar so ga.e

rahbar so gae ham-safar so gae

kaun jagega hum bhi agar so gae

gesu-e-waqt ab kaun suljhaega

be-KHabar jag uThe ba-KHabar so gae

is haqiqat se inkar mumkin nahin

so gai qaum jab dida-war so gae

miT gaya dil se kya KHauf-e-dar-o-rasan

log phulon pe kya soch kar so gae

apni barbaadiyan apne hathon huin

jagna tha hamein hum magar so gae

be-gharon ko takalluf se kya wasta

nind aai sar-e-rahguzar so gae

wo gae ghar ki ra'naiyan bhi gain

yun laga jaise diwar-o-dar so gae