rahbar tera sitara na rahe

rāhbar terā sitāra na rahe

justujū aisī ḳhudārā na rahe

jo na ik duuje kā ho ham meñ gumāñ

ham meñ phir kuchh bhī hamārā na rahe

jism hī jism ho aur ruuh na ho

vasl vo mujh ko gavārā na rahe

muntazir ho na terī āñkheñ to

merī kashtī kā kināra na rahe

pyaar āñkhoñ se chhalaktā hī hai

dil ke paimāne meñ saarā na rahe

aur kuchh kam ho to phir kyā kam hai

pyaar kam ho to guzārā na rahe

phūñk maaro ye ubhar aa.egā

raakh meñ dab ke sharāra na rahe

kyā sambhalne kā maza aa.e jo

terī bāhoñ kā sahārā na rahe

rah chukā paas tire jo ab to

dil mire paas dobāra na rahe

rahbar tera sitara na rahe

justuju aisi KHudara na rahe

jo na ek duje ka ho hum mein guman

hum mein phir kuchh bhi hamara na rahe

jism hi jism ho aur ruh na ho

wasl wo mujh ko gawara na rahe

muntazir ho na teri aankhen to

meri kashti ka kinara na rahe

pyar aankhon se chhalakta hi hai

dil ke paimane mein sara na rahe

aur kuchh kam ho to phir kya kam hai

pyar kam ho to guzara na rahe

phunk maro ye ubhar aaega

rakh mein dab ke sharara na rahe

kya sambhalne ka maza aae jo

teri bahon ka sahaara na rahe

rah chuka pas tere jo ab to

dil mere pas dobara na rahe